«Այս երկրում ապրել չարժե. ես իմ անձնագիրը պատռել ու նետել եմ ԱԺ-ի գլխին և հեռանալու եմ Հայաստանից` չնայած, որ պետությունը հարգում եմ»: Այսօր տեղի ունեցած մամուլի ասուլիսի ժամանակ այս մասին ասաց գրող Վահրամ Սահակյանը` հավելելով, որ եթե իր ասուլիսին մեծ թվով լրագրողներ են ներկայացել, նշանակում է` ինքն իրենից ինչ-որ բան ներկայացնում է` ճիշտ այնպես, ինչպես, իր իսկ խոսքերով` «գերմանացի Ռուբենը»:
Նա նաև նշեց, որ իր վրա հարձակում չի եղել, իրեն չեն ծեծել: «Իրավունք չունե՞մ մի անգամ կատակելու, կատակը մնում է կատակ: Ոչ մի նպատակ չունեի, միայն կատակ էի անում: Ուղղակի ընկել էի գետնին, ընկերուհուս խնդրել, որ բերանիս մոտ կետչուպ քսի: Այսքանը»,- պատմեց նա:
Վահրամ Սահակյանը նաև տեղեկացրեց, որ իրեն մի քանի անգամ փորձել են կաշառել. «Բայց ես երբեք կաշառք չեմ վերցրել: Կաշառք չեն վերցրել նաև դերասաններ Հրանտ Թոխատյանն ու Վարդան Պետրոսյանը»:
Գրողը նաև ներողություն խնդրեց օրեր առաջ իրեն զանգահարած և իր որպիսությամբ հետաքրքրված` ասուլիսին ներկա լրագրողներից մեկից, ում հեռախոսով սեռական բնույթի հայհոյանք էր տվել:
Անդրադառնալով «Հարսնաքար» ռեստորանում տեղի ունեցած հայտնի միջադեպին` Սահակյանը նկատեց, որ ոչ ոքի ծեծել չի կարելի: «Ծեծելն ու գնդակահարելը հարցի լուծում չեն: Բայց երբ Գագիկ Բեգլարյանին չբռնեցին, երբ մի պատիժ ներվեց, կլինեն երկրորդը, երրորդը, կլինեն գերմանացի Ռուբենը, ֆրանսիացի Արթուրը և այլն: Եթե երկրում չկա պատիժ, կնշանակի` ամեն ինչ կարելի է, ամեն մեկին կարելի է ծեծել»,- ասաց նա` հավելելով, որ ինքը հոգնել է պայքարելուց:
Վահրամ Սահակյանը, անդրադառնալով ՀՀ երեք նախագահներին, Լևոն Տեր-Պետրոսյանին համարեց այս ազգի առաջին դավաճանը: «Իսկ Սերժ Սարգսյանը` ոչ: Նա գոնե գիրք է կարդում, այն էլ` Վահրամ Սահակյանի հեղինակածը: Երկրորդ նախագահ Ռոբերտ Քոչարյանն ընդհանրապես մարդ չէր, ժողովրդի ասած`իսկական գյուրզա»,- ասաց նա:
Լուսանկարը՝ PanARMENIAN Photo-ի
