Ռոբերտ Քոչարյանի Մոսկվա այցին հաջորդած Սերժ Սարգսյանի զանգը Մեդվեդևին ՆԺԿ ղեկավար Արամ Կարապետյանը պայմանավորեց այն հանգամանքով, որ երբ Հայաստանում իրավիճակը ծանրանում է, բոլորը սկսում են օգնություն որոնել Ռուսաստանում:
«Սերժ Սարգսյանը պայմանավորվել է, որպեսզի մոտակա ժամանականերում այցելի Մոսկվա և հանդիպի Մեդվեդևին: Ամենայն համանականությամբ, Սերժ Սարգսյանը ցանկանում է հասկանալ, թե Ռուսաստանը, վերջիվերջո, ինչ քաղաքականություն է որդեգրելու Անդրկովկասում: Այն, ինչ կատարվում է հիմա արաբական երկրներում, կանգ չի առենելու, գալու է Մերձավոր Արևելք և շատ մոտ է լինելու մեր սահմաններին, և այս ամենից ելնելով՝ Սերժ Սարգսյանը հասկանում է, որ փոփոխությունները մոտ են»,- հայտարարեց Արամ Կարապետյանը:
Արամ Կարապետյանը նշեց, թե բոլորի համար պարզ է, որ Ռոբերտ Քոչարյանի տանիքը Պուտինն է, և եթե Պուտինը առաջադրվի Ռուսաստանի նախագահի թեկնածու, Քոչարյանն էլ Հայաստանում կառաջադրվի, իսկ եթե ոչ` ապա Քոչարյանն էլ չի առաջադրվի, կհամարի Պուտինը, որ Մեդվեդևին պետք է թողնել 6 տարի՝ ուրեմն Քոչարյանն էլ կհամարի, որ պետք է սատարել Սերժ Սարգսյանին, եթե ոչ` կլինի հակառակը: Ըստ Կարապետյանի՝ Սերժ Սարգսյանն իր համար որպես տանիք է դիտարկում թե՛ Մեդվեդևին և թե՛ Պուտինին:
Այդուամենայնիվ, Կարապետյանի դիտարկմամբ, Ռոբերտ Քոչարյան-Սերժ Սարգսյան թեժացումները զուտ տնտեսական բնույթի խնդիրներ են. «Քոչարյանն ի վերջո պետք է փորձի իր տեղը գտնել»:
Հարցին, թե ով է իր կամ Լևոն Տեր-Պետրոսյանը տանիքը, Արամ Կարապետյանը պատասխանեց. «Ես տանիք չունեմ, դրա համար էլ համարձակ խոսում եմ, որովհետև տանիքները նաև սահմանափակումներ են պարտադրում: Տեր-Պետրոսյանն էլ տանիք չունի և դժվար թե ունենա»:
