ԲՀԿ-ն բաց է տեղեկատվություն տրամադրելու հարցում: Այսօր «Առաջին լրատվական»-ի հետ զրույցում այս մասին ասաց ԲՀԿ մամլո խոսնակ Տիգրան Ուրիխանյանն՝ անդրադառնալով «Ինֆորմացիայի ազատության կենտրոնի» «սև ցուցակին», որում ընդգրկվել է նաև ԲՀԿ-ն՝ նախընտրական ծախսերի վերաբերյալ տեղեկատվություն չտրամադրելու համար:
Անդրադառնալով կենտրոնի ղեկավարի այն խոսքին, թե նաև դատական գործ է սկսվել ԲՀԿ-ի դեմ՝ ասաց, որ դատական գործ հարուցել իրենք չեն կարող, կարող են հայց ներկայացնել դատարան, դատարանը կա՛մ հայցը կընդունի, կա՛մ համապատասխան գործառույթներ կիրականացնի: Նրա խոսքով՝ այդուհանդերձ, եթե այդպիսի ընթացք սկսվի, կուսումնասիրեն խնդիրը և համապատասխան քայլեր կձեռնարկեն:
Տիգրան Ուրիխանյանը նաև չհամաձայնեց այն պնդումներին, թե ԲՀԿ-ն տեղեկատվություն չի տրամադրել: Տիգրան Ուրիխանյանի խոսքով՝ բնականաբար նրանք ստացել են ինֆորմացիա, պարզապես այն ստացել են բանավոր՝ կուսակցության կենտրոնական գրասենյակի աշխատակազմի ղեկավարի կողմից, ինչը սակայն անհասկանալի պատճառներով նրանց չի բավարարել:
«Ուզում եմ նաև լրացնել, որ «Բարգավաճ Հայաստան» կուսակցությունը հավուր պատշաճի, օրենքով սահմանված կարգով ներկայացրել է իր ֆինանսական գործունեությունը, հիմնադրամը եղել է պետական համապատասխան լիազոր մարմնի հսկողության ներքո, եղել է բաց, թափանցիկ: Եթե նրանց չի բավարարել բանավոր պատասխանը, կարող էին այդ ինֆորմացիան ստանալ ԿԸՀ-ի պաշտոնական կայքէջի միջոցով, կարող էին նորից դիմել և ստանալ, մենք շատ բաց ենք այդ հարցում որևէ խնդիր չունենք, կան նաև կազմակերպություններ, որոնք ինչ- ինչ ծրագրեր իրականացնելով՝ այդ ինֆորմացիան ունեն»,- եզրափակեց իր խոսքը Տիգրան Ուրիխանյանը:
Հիշեցնենք, որ Ինֆորմացիայի ազատության կենտրոնը, ամփոփելով այս տարվա երկրորդ եռամսյակը, ներկայացրել էր տեղեկատվություն ստանալու իրավունքը խախտած կուսակցությունների «սև ցուցակ»-ն, որում ընդգրկված են Հանրապետական կուսակցությունը, «Բարգավաճ Հայաստան» կուսակցությունը, ՀԱԿ-ը և Հայաստանի դեմոկրատական կուսակցությունը:
