Թուրքական Doğan լրատվական գործակալության փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները Թունջելի նահանգի Փյուլումյուր շրջանում հրթիռակոծել ու երկարափող զենքերից գնդակոծել են Kobra տիպի երկու զրահամեքենա:
Միջադեպը գրանցվել է երեկ՝ տեղական ժամանակով ժամը 17.00-ին: Հարձակման ժամանակ զրահամեքենաներում գտնվողները` 8 մարդ, հրաշքով չեն տուժել: Հրթիռներից մեկն ընկել է մեքենաների մերձակայքում, իսկ մյուսը դիպել է դրանցից մեկի ներքևի հատվածին, սակայն չի պայթել: Բացի այդ, քուրդ զինյալներն ինքնաձիգերով ու երկարափող զենքերով գնդակոծել են թուրքական զրահամեքենաները:
Իսկ Էլյազըղի նահանգի Փալո շրջանում PKK-ի զինյալները հարձակվել են բեռնատար գնացքի վրա: Երկաթգծի վրա նրանց տեղադրած ականի վրա պայթել է Դատվանից Էլյազըղ մեկնող բեռնատար գնացքը: Դրա հետևանքով ռելսերից դուրս է եկել 5 վագոն: Զոհեր ու վիրավորներ չեն գրանցվել, թեև պայթյունի ժամանակ գնացքում են եղել 2 մեքենավար, 1 ծառայող, 4 զինված պահապան:
Բաթմանի նահանգում էլ PKK-ի զինյալները հարձակվել են ոստիկանական մեքենայի վրա: Դա տեղի է ունեցել երեկ՝ տեղական ժամանակով ժամը 21.00-ին:
