Հյուսիսային Իռլանդիայի ոստիկանությունը հայտարարել է բրիտանացի զինվորների նկատմամբ նոր հետաքննության մասին, որոնք առնչություն ունեն 1972թ. հունվարի 30-ին` կիրակի օրը, 14 խաղաղ ցուցարարների սպանությանը: Այս մասին գրում է The Independent-ը:
Հետաքննության սկզբի հստակ օրը հայտնի չէ: Հյուսիսիռլանդական ոստիկանության ղեկավար Մեթ Բեգոտը հայտարարել է, որ քննչական խմբի մեջ ընդգրկվելու է 30 մարդ:
Նոր հետաքննությունը սկսվելու է ի պատասխան զոհերի հարազատների, որոնք պահանջում են պատասխանատվության ենթարկել մեղավորներին:
Այս նախաձեռնությունն արդեն Կարմիր կիրակիի գործը հետաքննելու երրորդ փորձն է: Այդ օրը հյուսիսիռլանդական Դերրի քաղաքում տեղի էին ունեցել բախումներ Հյուսիսային Իռլանդիայում քաղաքացիական իրավունքների պաշտպանության համար հանդես եկող ասոցիացիայի երթի մասնակիցների ու Մեծ Բրիտանիայի անկարգելային (պարաշյուտային) գնդի 1-ին գումարտակի զինվորների միջև:
Պարաշյուտիստները ցուցարարների ուղղությամբ կրակ էին բացել, ինչի հետևանքով սպանվել էր 13 մարդ, ևս մեկն ավելի ուշ մահացել էր ստացած վնասվածքներից:
Առաջին հետաքննությունը, որն անցկացվել է Դերրի անկարգություններից հետո, անմեղ էր ճանաչել զինվորներին, սակայն 1998թ. Թոնի Բլերի կառավարությունը նախաձեռնեց մեկ այլ հետաքննություն, որը տվեց բոլորովին հակառակ արդյունք: Այն հրապարակվեց միայն 2010թ. հունիսին: Այդ կապակցությամբ հայտարարությամբ հանդես եկավ Մեծ Բրիտանիայի վարչապետ Դևիդ Քեմերոնը, որը բրիտանացի զինծառայողներին մեղավոր ճանաչեց սպանությունների մեջ` նրանց գործողությունները որակելով «անհիմն ու անարդարացի»:
Հետաքննությունը պարզել էր, որ Արյունոտ կիրակիի բոլոր սպանվածները անզեն են եղել ու նրանց մի մասը սպանվել էին թիկունքից. իրական ապացույց, որ բրիտանացի զինվորներին սպառնացել է իրական վտանգ, չի եղել: Այսպես, նրանցից ոչ ոք չի ստացել հրազենային վնասվածք, իսկ այն մասում, որտեղ նրանք կանգնած են եղել, ոստիկանությունը պարկուճներ չի հայտնաբերել:
Հետաքննությունը երրորդ անգամ վերսկսելու փորձը բրիտանական հասարակությունում առաջացրել է ոչ միանշանակ ռեակցիա: Նախ` Հյուսիսային Իռլանդիայի ոստիկանությունն առանձնապես ոգևորված չէ այն բանից, որ զգալի ջանքեր պետք է ներդնի 40-ամյա վաղեմության փաստերը հետաքննելու համար` ընթացիկ խնդիրների լուծմամբ զբաղվելու փոխարեն: Երկրորդ` այդ իրադարձություների շատ մասնակիցների պատասխանատվության ենթարկելը դժվար կլինի:
