«Սիրիայի բարեկամների» խումբը համաձայնության է եկել «զգալիորեն մեծացնել» Սիրիայի ընդդիմությանը հատկացվող օգնությունը և կոչ է արել ՄԱԿ-ի ԱԽ-ին բանաձև ընդունել Դամասկոսի դեմ՝ համաձայն ՄԱԿ-ի Կանոնադրության 7-րդ գլխի: Այս մասին ասվում է Փարիզում խմբի հանդիպման արդյունքում արված համատեղ հայտարարության մեջ:
Բացի այդ, ինչպես հաղորդում է RIA Novosti-ն, հանդիպման մասնակիցները համաձայնության են եկել, որ Սիրիայի նախագահ Բաշար Ալ-Ասադը «պետք է հրաժարվի իշխանությունից»՝ հաշվի առնելով, որ «նա խաթարում է վստահությունը քաղաքական գործընթացին անցնելու ճանապարհին»:
Նշենք, որ ՄԱԿ-ի Կանոնադրության 7-րդ գլուխը նախատեսում է տարբեր գործողություններ, այդ թվում՝ ռազմական, այն դեպքում, եթե վտանգ է առաջանում համընդհանուր խաղաղության համար: Այնուամենայնիվ, Փարիզի հանդիպման մասնակիցներն ակնարկել են, որ տվյալ փուլում Սիրիայում ռազմական միջամտության հարց չի ուսումնասիրվում: Գերմանիայի արտգործնախարար Գիդո Վեստերվելեն նշել է, որ «Սիրիայի բարեկամների» խմբի ձևաչափը չի ենթադրում ռազմական գործողությունների մասին քննարկումներ: «Առաջին հերթին, մենք պետք է գործադրենք մեր քաղաքական և տնտեսական ճնշումները Սիրիայի վարչակարգի նկատմամբ»,- ասել է նա:
Հիշեցնենք. Ռուսաստանը և Չինաստանը հանդիպմանը չեն մասնակցել:
