Հարավային Կորեայի քաղաքացի Հո Սու Հվին ձյերբակալվել է առանց իր երկրի իշխանությունների գիտության Հյուսիսային Կորեա այցելությունից հետո: Ինչպես հաղորդում է Associated Press-ը, 68-ամյա Հոս Սու Հվին Կորեայի միավորման դաշինքի փոխնախագահն է: Նա Պհենյան է մեկնել մարտի 24-ին՝ Կիմ Չեն Իրի 100-ամյակին նվիրված միջոցառումներին մասնակցելու: Հյուսիսային Կորեա նա մտել է Չինաստանի տարածքով:
Հյուսիսային Կորեայի իշխող կուսակցության «Նոդոն Սինմուն» թերթը գրում է, որ իր այցի ընթացքում ակտվիստը հանդիպում է ունեցել երկրի երկրորդ դեմքի՝ Գերագույն ժողովրդական ժողովի նախագահության նախագահ Կիմ Յոն Նամի հետ:
Հո Սու Հվին ձերբակալվել է Հարավային Կորեա մտնելուց անմիջապես հետո: Հյուսիսային Կորեայի կողմից նրան ուղեկցում էր ցնծացող ամբոխը, իսկ Հարավային Կորեայի սահմանի վրա նրան սպասում էին զինվորականները: Սահմանն անցնելով՝ նա բացականչել է. «Կեցցե միավորումը»:
Հարավային Կորեայի օրենքներով՝ անօրինական կերպով Հյուսիս այցելելու համար սպասվում է մինչև 10 տարվա ազատազրկում: Հաղորդվում է, որ Սու Հվին գիտակցաբար է հայրենիք վերադարձել Կորեաների սահմանով և ոչ թե Չինաստանով, որպեսզի ուշադրություն հրավիրի միավորման խնդրի վրա:
Ակտիվիստի ձերբակալությունից հետո Պհենյանը Հարավային Կորեայի նախագահ Լի Մեն Բակին մեղադրել է«միության գործին» դավաճանելու մեջ:
Հյուսիսային և Հարավային Կորեան ֆորմալ կերպով 1953 թ. գտնվում են պատերազմական վիճակում:
