Ռուսաստանի ընդդիմության ներկայացուցիչներն ամերիկյան կոնգրեսականներին են ներկայացրել Ռուսաստանում մարդու իրավունքների խախտման նոր դեպքերին վերաբերող տեղեկություններ, ինչպես նաև անձանց անուններ, որոնք պատասխանատու են այդ խախտումների համար։ Սպասվում է, որ վաղը՝ հուլիսի 6-ին, այսպես կոչված, «Մագնիտսկու ցուցակը» քննարկելիս այդ անունները նույնպես կներառվեն Ռուսաստանում մարդու իրավունքների խախտումների համար պատասխանատու մարդկանց «սև ցուցակում»։ Այս մասին գրում է NG-ն։
Ներկայացված նոր ցուցակում են դատավորների, իրավապահների, դատախազների, բարձրաստիճան պաշտոնյաների անուններ, որոնք պատասխանատու են ընդդիմության ներկայացուցիչների հետապնդումների համար։ Հաղորդվող տեղեկությունների համաձայն՝ կոնգրեսականներին այդ փաստաթղթերը փոխանցել են Բորիս Նեմցովն ու Գարի Կասպարովը։
Հիշեցնենք, որ Մագնիտսկին Hermitage Capital հիմնադրամի իրավաբանն էր, ով չպարզված հանգամանքներում մահացել էր բանտում։ Նա բարձրաձայնել էր Ռուսաստանում մարդու իրավունքների, իշխանությունների կողմից օրենքների խախտումների մասին։ Նրա մահվան հետ կապված բոլոր անձինք հայտնվել են ԱՄՆ «սև ցուցակում», նրանց դեմ կիրառվում են պատժամիջոցներ։ Սպասվում է, որ Ռուսաստանում այդ ոլորտում խախտում թույլ տվող շատ այլ պաշտոնյաներ կհայտնվեն «Մագնիտսկու ցուցակում»։
