Խաղաղության պայման պետք է լինի յուրաքանչյուր կողմի` փոխզիջումների գնալու համաձայնությունը

«Ազատություն» ռադիոկայանի փոխանցմամբ` ԱՄՆ-ի Միչիգանի համալսարանի պրոֆեսոր, 1994-97 թվականներին Հայաստանի նախագահի ավագ խորհրդական Ժիրայր Լիպարիտյանը հարցազրույց է տվել News.az ադրբեջանական կայքին, որը հրապարակվել է չորեքշաբթի օրը։

Անդրադառնալով ղարաբաղյան հակամարտության կարգավորման հարցին` Լիպարիտյանը ասել է, թե հակամարտության կողմերը պետք է գիտակցեն, որ սահմանափակ ժամանակ ունեն խնդիրը լուծելու համար։

Կարծիք հայտնելով, որ այսօր ժամանակը աշխատում է Ադրբեջանի օգտին, նա ավելացրել է. – «Կարող են լինել նաև այլ հիմնավորումներ, թե ժամանակը աշխատում է նաև Հայաստանի օգտին»։ «Հաշվարկները միշտ չէ, որ ճիշտ են», – նշել է նա։

«Հակամարտությունների առկայությունը նվազեցնում է ժողովրդավարության մակարդակը, ինչը խոչընդոտում է զարգացմանը։ Այս երկրները պետք է բանաձև գտնեն խաղաղության համար։ Այդպիսի խաղաղության պայման պետք է լինի յուրաքանչյուր կողմի` փոխզիջումների գնալու համաձայնությունը։ Ես չեմ վստահում միջնորդներին` ես գերադասում եմ ուղիղ բանակցությունները», – ասել է Ժիրայր Լիպարիտյանը։

Պատասխանելով հարցին, թե ո՞րն է Հարավային Կովկասում հակամարտությունների պատճառը, նա նշել է, որ Ադրբեջանի, Հայաստանի, Վրաստանի ժողովուրդները տարածաշրջանը չեն դիտարկում որպես մեկ ամբողջություն, որպես միասնական Կովկաս։ «Այս երկրները մինչև հիմա դրսի ուժեր են փնտրում` լուծելու համար իրենց ներքին խնդիրները։ Խորհրդային ժամանակներում կովկասյան հանրապետությունները նայում էին դեպի Մոսկվա` որպես ուժի, որն ընդունակ է լուծել իրենց ներքին խնդիրները։ Հիմա նրանք հայացքները հառում են նաև դեպի Վաշինգտոն և Բրյուսել։ Կովկասյան երկրները մինչև հիմա իրենց ապագան, իրենց հարաբերությունների ապագան կապում են տարածաշրջանից դուրս գտնվող երկրների հետ», – ընդգծել է Լիպարիտյանը։

Նրա խոսքերով` հարավկովկասյան երկրները զարգացման ընդհանուր պատկերացման կարիք ունեն, որը պետք է ընդգրկի տարածաշրջանում առկա բոլոր հակամարտությունների դադարեցումը, մասնավորապես` Ղարաբաղի հակամարտության։

Ժիրայր Լիպարիտյանը նշում է, որ դա, իր հերթին, բերում է տարածաշրջանի գործերին Ռուսաստանի միջամտությանը, որը դրական գործոն չէ։

Նրա կարծիքով, ղարաբաղյան հակամարտությունը միայն Ադրբեջանի և Հայաստանի միջև չէ` այն ներառում է երկու-երեք այլ երկրներ։

Հարավկովկասյան երկրների զարգացման առումով, Լիպարիտյանի կարծիքով, Հայաստանը զիջում է հարևաններին։ Նրա խոսքերով` Վրաստանի և Ադրբեջանի համեմատ Հայաստանը «շատ թույլ» երկիր է, Ադրբեջանի զարգացումը կշարունակվի, Վրաստանը, իր հերթին, կզարգանա` նույնիսկ առանց Աբխազիայի և Հարավային Օսիայի։

Լիպարիտյանը հիշում է, որ Լևոն Տեր-Պետրոսյանի նախագահության ժամանակաշրջանում ուսումնասիրել են, թե Հայաստանը ինչպես կարող է զարգանալ ու նորմալ երկիր դառնալ: Սակայն Ադրբեջանի ու Թուրքիայի հետ խնդիրները խոչընդոտել են դրան:

«Իրականությունն այն է, որ զարգացմանը կարելի է հասնել հարևան երկրների հետ լավ հարաբերություններով: Խաղաղության հաստատումը մեծ կարևորություն ունի Հայաստանի համար: Այնուամենայնիվ, Հայաստանում որոշ ուժեր 1997-ին Լևոն Տեր-Պետրոսյանին ստիպեցին հրաժարական տալ», – News.az-ի հարցազրույցում ասել է Ժիրայր Լիպարիտյանը, ով 1994-97 թվականներին եղել է Տեր-Պետրոսյանի ավագ խորհրդականը: