Ըստ «Wikileaks» կայքի հրապարակած տեղեկությունների` 2005 թ. ՀՀ բնապահպանության նախարար Վարդան Այվազյանը ոսկի արդյունահանող Global Gold Corporation միջազգային կազմակերպությունից պահանջել էր երեք միլիոն դոլար կաշառք: Ընկերությունն այդ գումարը չի վճարել, իսկ նախարարությունն էլ հետ է կանչել երկու հանքավայրերում աշխատանքներ իրականացնելու ընկերության թույլտվությունը: 2005 թ. հուլիսին ՀՀ բնապահպանության նախարար Վարդան Այվազյանը Global Gold Corporation ընկերության իրավաբան Աշոտ Պողոսյանին հայտնել էր, որ անհրաժեշտ է իր մոտ գործընկերոջը եւ ԱԺ պատգամավոր Մուրադ Գուլոյանին վճարել երեք միլիոն դոլար կաշառք` պնդելով, որ այդ վճարումն անհրաժեշտ է 2003 թ. գործարքն ավարտելու համար:
Այսօր «Հայելի» ակումբում հրավիրած մամուլի ասուլիսի ժամանակ ՀՀ ԱԺ պատգամավոր, ԱԺ տնտեսական հարցերի մշտական հանձնաժողովի նախագահ Վարդան Այվազյանից լրագրողները հետաքրքրվեցին, թե ինչպես է պատրաստվում արձագանքել նախկին բնապահպանության նախարարը «Wikileaks»-ի հրապարակումներին:
«Պետք չէ, որ ես յոթ տարի շարունակ ապացուցեմ, որ ես ես եմ: 2005 թվականից անընդհատ այդ նույն թեման է շոշափվում: Ես կուզեմ, որ այն կազմակերպությունը, որը մեղադրում է, մի քիչ իրա կենսագրականին ուշադրություն դարձնի, իրա հայտնվելուն այդ դաշտում: Ինձ մեղադրում են 2005 թվականից, որ ես Մուրադ Գուլոյանի համար պահանջել եմ կաշառք: Վերջիվերջո չարի վերջի տարբերակը պետք ա լինի: Ձայնագրություններն ինչի՞ չեն ցույց տալիս »,- ասաց նա:
Լրագրողների հարցին, թե ինքն ունի՞ ձայնագրությունները, Վարդան Այվազյանն ասաց, որ ինքը հատուկ ծառայությունների աշխատակից չէ, ոչ էլ լրատվության ոլորտի աշխատող, որ ձայնագրություններ անի: Նա հիշեցրեց, որ 2007 թ. մի ամբողջ աղմուկ բարձրացավ նախընտրական շրջանում:
«Ես էլ կարող եմ ասել, թե ինչպես է ձեռք բերվել այդ կազմակերպությունը, ինչպես են չորս հոգու չորս հազար դոլար կաշառք տվել, ինչպես են հայտնվել Նյու-Յորքում: Ես որպես պետական պաշտոնյա պետական ունեցվածքն եմ պաշտպանել»,- իրեն հասցեագրված մեղադրանքներին այսպես արձագանքեց նա: Նա տարակուսում է, թե ինչ կապ ունի Մուրադ Գուլոյանն այդ հանքավայրի հետ:
Լրագրողները հետաքրքրվեցին, թե ինչու Վարդան Այվազյանը դատի չի տալիս իր դեմ մեղադրանքներ հնչեցնողներին , եթե դրանք չեն համապատասխանում իրականությանը: Որպես օրինակ էլ նշվեց, թե ինչպես երեք ԱԺ գործարար պատգամավորները դատի տվեցին «Հայկական ժամանակ»-ին: Պարզվեց, որ նա չի ուզում հետեւել նրանց օրինակին:
