Պարագվայի զինված ուժերն ու ոստիկանությունը հայտարարել են, որ աջակցում են խորհրդարանի կողմից տապալված նախագահ Ֆերնանդո Լուգոյին: Այս մասին հաղորդում է RIA Novosti-ն՝ վկայակոչելով Telesur հեռուստաալիքին:
Բանակը և ոստիկանությունը դատապարտում են պատգամավորների կողմից ձեռնարկված գործընթացը, որը հանգեցրել է հունիսի 22-ին Լուգոյի իմփիչմենթին: Այս մասին ասվում է բանակի և ոստիկանության տարածած համատեղ հայտարարության մեջ:
«Մենք դեմ ենք հանդես գալիս նախագահ Լուգոյի դեմ ձեռնարկված գործողություններին, առավել ևս, որ դրանք իրականացվել են առանց Պարագվայի հասարակության հետ հանրային քննարկումների, ինչը նշանակում է լուրջ հետքայլ տարածաշրջանի ժողովրդավարացման ճանապարհին»,- ասվում է հաղորդագրության մեջ:
Լուգոյին իմփիչմենթ հայտարարելու պատճառը եղել է նրա կողմից սեփական պարտականությունները վատ իրականացնելը: Մասնավորապես, դա կապված է անհող գյուղացիների և ոստիկանության միջև հունիսի 15-ին տեղի ունեցած բախման հետ, որի արդյունքում զոհվել է 17 մարդ:
Ընդ որում, բանակի հրամանատարությունը նշում է, որ, չնայած երկրում կատարվող դեպքերի հետ իր անհամաձայնությանը, խոսք անգամ չի կարող լինել բանակի կողմից ուժի կիրառման մասին:
Լուգոյին իմփիչմենթ հայտարարելուց հետո նախագահի պարտականությունները մինչև 2013 թ. ապրիլը կիրականացնի փոխնախագահ Ֆեդերիկո Ֆրանկոն, մինչև երկրում անցկացվեն համընդհանուր ընտրություններ: Պարագվայի խորհրդարանի գործողությունները քննադատության են ենթարկվել մի շարք երկրների կողմից: