«Թռչնասերների կենտրոն» հասարակական կազմակերպությունը, «Բուրգ» երիտասարդական բնապահպանական կազմակերպությունը, «ԷկոԼուր» տեղեկատվական հասարակական կազմակերպությունը, «Էկոլոգիական անվտանգության ապահովման ժողովրդավարության զարգացման» հասարակական կազմակերպությունը, Դիլիջանի «Օրհուս» կենտրոնը,
«Բիոսոֆիա» հասարակական կազմակերպությունը, «ԷկոԴար» հասարակական կազմակերպությունը Կապանում Շահումյանի ոսկու բազմամետաղային հանքավայրի բաց եղանակով շահագործման վերաբերյալ նամակի միջոցով իրենց դժգոհությունն են հայտնել «Dundee Precious Metals Inc.»-ի ղեկավարությանը, ՀՀ կառավարությանը, ՀՀ էներգետիկայիև բնական պաշարների, բնապահպանության, առողջապահության, արտակարգ իրավիճակների, տարածքային կառավարման նախարարություններին և Վերակառուցման ու զարգացման եվրոպական բանկին:
Նամակում մասնավորապես նշվում է. ««Deno Gold Mining Company» ՓԲԸ-ն մտադիր է Կապանում Շահումյանի ոսկու բազմամետաղային հանքը շահագործել բաց եղանակով: Թեպետ բաց շահագործման նախագիծը պաշտոնապես դեռ չի ներկայացվել ՀՀ բնապահպանության նախարարության բնապահպանական փորձաքննությանը, նրա տեխնիկական մասն արդեն ակտիվ քննարկվում է կառավարական շրջանակներում»:
Հաշվի առնելով Կապան քաղաքի բնակչության առողջության համար ռիսկերը, որոնք կարող են բազմակի անգամ աճել Շահումյանի ոսկու բազմամետաղային հանքավայրը բաց եղանակով շահագործելիս, նամակի հեղինակները կոչ են արել բոլոր շահագրգիռ կողմերին` հրաժարվել Շահումյանի ոսկու բազմամետաղային հանքավայրի բաց եղանակով շահագործման նախագծից:
