Այսօր Կահիրե է ժամանել Ռուսաստանի Դաշնության նախագահ Դմիտրի Մեդվեդևի հատուկ ներկյացուցիչը Մերձավոր Արևելքում` Ալեքսանդր Սալտանովը: Այս մասին հարղոդում է RBC-ն` մեջբերելով Ռուսաստանի ԱԳՆ տեղեկատվության և մամուլի վարչության հաղորդագրությունը:
Ըստ կայքի` Ալեքսանդր Սալտանովը Եգիպտոսի նախագահ Հոսնի Մուբարաքին է փոխանցել ՌԴ նախագահի բանավոր ուղերձը: Բացի այդ, Սալտանովը բանակցություններ է վարել Եգիպտոսի փոխնախագահ Օմար Սուլեյմանի և արտաքին գործերի նախարար Ահեմդ Աբու Ալ-Ղեյթի հետ:
Հիշեցնենք, որ մի շարք երկրներ փորձում են միջնորդական դեր ստանձնել ներեգիպտական խնդիրներին լուծումներ տալու համար: Առավելագույնը, ինչ հաջողվել է նրանց, մի քանի օր առաջ սեղանի շուրջ թե՛ ընդդիմությանը, թե՛ իշխանությանը նստեցնելն էր, սակայն ինչպես ցույց են տալիս զարգացումները, այդ բանակցությունները դեռ արդյունք չեն տալիս:
Ավելին, ցույցերը գնալով կրկին բազմամարդ են դառնում, իսկ գրեթե բոլոր քաղաքներում մեծ թափ են առնում գործադուլները, որոնք լրացուցիչ լարվածություն են ստեղծում ներքաղաքական կյանքում: