Ստեփանակերտի օդանավակայանը բավականին ժամանակ է, ինչ կառուցված է, մի քանի անգամ հայտարարվել էր առաջին թռիչքի ժամկետը, նույնիսկ օդանավի տոմսի արժեքն էր շրջանառվում: Սակայն այդ ժամկետն առայժմ ապագայում է մնում և մինչ օրս հայտնի չէ, թե երբ այդ ապագան իրականություն կդառնա:
ԼՂՀ քաղաքացիական ավիացիայի վարչության պետ Դմիտրի Ադբաշյանն «Առաջին լրատվական»-ի հետ զրույցում նշեց, որ չի կարող ասել, թե երբ կկայանա առաջին չվերթը: «Կան հարցեր, որոնք մինչև օրս լուծված չեն: Հիմա Հայաստանի քաղավիացիայի գլխավոր վարչության հետ այդ հարցերը պարզաբանվում են և դրանց համար լուծումներ են փնտրվում»,- ասաց Դ.Ադբաշյանը` պարզաբանելով, որ խոսքը կազմակերպչական հարցերի մասին է՝ ով և ինչպես պետք է սպասարկի օդանավը, կանոնակարգը և այլն:
Սակայն միաժամանակ Ադբաշյանը նշեց. «Մյուս խոչընդոտների մասին ես չեմ կարող խոսել, ես զբաղված եմ տեխնիկական և կազմակերպչական հարցերով: Այսինքն՝ եթե այդ տեխնիկական հարցերը լուծվեն, հնարավոր կլինի չվերթն իրականացնել, բայց թե երբ կկայանա, չեմ կարող ասել»:
ԼՂՀ քաղավիացիայի վարչության պետը նաև դժվարացավ ասել, թե ով է որոշելու չվերթի օրը. «Շատ-շատ հարցեր պետք է լուծվեն` ինքնաթիռի տեխնիկական փաստաթղթերը պետք է գան, պետք է ուսումնասիրենք իրականությանը ինչն է համապատասխանում, ինչը՝ ոչ… Ես պատրաստ եմ հենց այսօր ինձնից կախված խնդիրներին լուծում տալ, բայց կան մի քանի «հարկեր», որտեղ պետք է այդ խնդիրները լուծում գտնեն: Իսկ թե որքան կտևի, ես չեմ կարող ասել»: