Մեծ Բրիտանիայի թագուհի Էլիզաբեթ 2-րդը Հյուսիսային Իռլանդիա այցի ընթացքում առաջին անգամ հանդիպել է մարզի առաջին փոխվարչապետի Մարտին Մակ-Գինեսի հետ: Այս մասին հայտնում է Belfast Telegraph-ը:
Նախկինում նա զբաղեցրել է «Իռլանդիայի հանրապետական բանակ» ահաբեկչական կազմակերպության ղեկավար պաշտոններից մեկը, որը պայքարում էր Հյուսիսային Իռլանդիայի անկախության համար:
Հանդիպումը տեղի է ունեցել քաղաքային թատրոնում այսօր` հունիսի 27-ին:
Ղեկավարների առաջին խորհրդանշական ձեռքսեղմումը մամուլի աչքից հեռու վայրում է տեղի ունեցել, ինչին հաջորդել են բանակցությունները, որոնց մասնակցել է նաև թագուհու ամուսինը` Ֆիլիպը, Հյուսիսային Իռլանդիայի առաջին նախարար Փիթեր Ռոբինսոնը, Իռլանդիայի Հանրապետության նախագահ Մայքլ Հիգգինսը՝ կնոջ հետ:
Հանդիպումից հետո բրիտանական թագուհին ու առաջին փոխնախարարը դարձյալ միմյանց ձեռք են սեղմել:
Էլիզաբեթ 2-րդի ու Մակ-Գիննեսի հանդիպումն ունի հատուկ նշանակություն, քանի որ վերջինիս անունը կապվում է 1979թ. տեղի ունեցած ահաբեկչության հետ, որի ժամանակ մահացել էր արքայազն Ֆիլիպի հորեղբայրը` Լուիս Մաունթբետենը:
Անձամբ Մակ-Գինեսը պնդում է, որ լքել է «Իռլանդիայի հանրապետական բանակի» շարքերը 1974թ.:
Էլիզաբեթ թագուհու այցը Հյուսիսահին Իռլանդիա անցնում է իր գահակալության 60-ամյակի տոնակատարությունների շրջանակում:
