Հունիսի 21-ին «Հին Մետեխի» վրացական հյուրանոցում հայկական կոնֆերանսի ժամանակ թաքցված նկարահանող սարք էր հայտնաբերվել: Ինչպես «Առաջին լրատվական»-ի հետ զրույցում տեղեկացրեց «Բազմազգ Վրաստան» կազմակերպության ղեկավար Առնոլդ Ստեփանյանը, ոստիկանությունում քրեական գործ է հարուցվել և քննություն է ընթանում: «Մեզ դեռ հստակ ոչինչ հայտնի չէ, առաջիկա օրերին եթե ոչինչ պարզ չլինի, մենք ինքներս կհետաքրքրվենք, թե ինչ փուլում է գտնվում քննությունը»,- նկատեց Առնոլդ Ստեփանյանը, ով լիահույս է, որ գաղտնալսողները հեշտությամբ կգտնվեն, քանի որ տեսագրված նյութում երևում են գաղտնի տեսագրություն կազմակերպած անձանց դեմքերը:
Հիշեցնենք, որ Վրաստանում Հայկական ասամբլեայի կազմակերպած կոնֆերանսի ավարտից հետո սրահը մաքրող հավաքարարուհին կազմակերպիչներին տեղեկացրել էր, որ ծաղիկներ են մոռացել սրահում: Վրաստանում հայկական ասամբլեայի անդամներից մեկը ծաղկամանից ծաղիկները հանել էր և հայտնաբերել նկարահանող սարք: Հյուրանոցի աշխատակիցների հետ զրույցում պարզ էր դարձել, որ կոնֆերանսից երեք ժամ առաջ երեք տղամարդ են եկել հյուրանոց: Ներկայանալով որպես կոնֆերանսի կազմակերպիչներ՝ տղամարդիկ սրահ են մտցրել արհեստական ծաղիկներով ծաղկամաններ, որոնց մեջ էլ տեղադրել են գաղտնի տեսագրող սարքեր:
