Երեկ հայտնի է դարձել, որ առաջիկա օրերին Սերժ Սարգսյանը մեկնելու է Բրյուսել, որտեղ մասնակցելու է Եվրոպայի Ժողովրդական կուսակցության համագումարին, ինչպես նաև հանդիպում է ունենալու Եվրամիության արտաքին հարցերի և անվտանգության հանձնակատար Քեթրին Էշթընի հետ:
Վերջին երեք-չորս ամիսների ընթացքում սա Սերժ Սարգսյանի երկրորդ այցն է Բրյուսել, իսկ այդ ընթացքում մի այց էլ կատարել է վարչապետ Տիգրան Սարգսյանը:
«Առաջին լրատվականի» այն հարցերին, թե ի՞նչ նշանակություն ունի այս այցը Բրյուսել, արդյոք սա կարո՞ղ է միտված լինել Հայաստանի ներքաղաքական կյանքին, ՌԱՀՀԿ փորձագետ Էդգար Վարդանյանը պատասխանեց․
«Չեմ կարող պնդել, որ կապված է Միջազգային ճգնաժամային խմբի զեկույցի հետ, պետք է ճշտել՝ երբ էր նախատեսված այցը, սակայն մի բան միանշանակ է․ նախ՝ Հայաստանը երկու հարցով կոնկրետ բանակցություններ է վարում Արևմուտքի հետ, դա մուտքի արտոնագրերի (վիզաների) տրամադրման հեշտացման խնդիրն է և ազատ առևտրի պայմանագիրը։ Եվ մենք գիտենք, որ եվրոպաշտոնյաններն ասում են, որ այս երկու խնդրի առնչությամբ կա առաջընթաց։ Տրամաբանական է ակնկալել, որ այս հարցերը լինելու են հիմնական հարցերից, որոնք կքննարկվեն այդ այցի ժամանակ։ Մենք նաև գիտենք, որ արևմուտքը, ընդհանուր առմամբ, մեծ ուշադրություն է դարձնում առաջիկա ընտրություններին և իր ներկա ու գալիք աջակցությունը Հայաստանին պայմանավորում է ապագա ընտրությունների որակով, ուստի բնականաբար այս հարցերն էլ կքննարկվեն»։
Մեր դիտարկմանը, թե Միջազգային ճգնաժամային խմբի զեկույցում ասվում է, որ անցած ընտրություններում, այնուամենայնիվ, առկա էին բացասական հին գործոնները, և հնարավո՞ր է, որ հետընտրական Հայաստանին տրված այս կոշտ գնահատականների շուրջ քննարկումներ լինեն, Է․ Վարդանյանը պատասխանեց․
«Այսպես թե այնպես հանդիպման ժամանակ զեկույցում առկա խնդիրներն արծարծվելու են ։ Ոչ միայն այդ, այլ մի շարք հեղինակավոր իրավապաշտպան կառույցներ և «ուղեղային կենտրոններ» կան, որոնք աշխատում են, որ փորձագիտական վերլուծության ենթարկեն քաղաքական և տնտեսական գործընթացները և կոնկրետ առաջարկներ անեն պետական պաշտոնյաներին։ Զեկույցում նշված գնահատականների շուրջ, կարծում եմ, ինչ-որ քննարկում կընթանա»։