Եմենի նախկին նախագահ Ալի Աբդալլահ Սալեհի եղբորորդին՝ Տարիկ Սալեհը, ժամանել է Ուկրաինա, որպեսզի «Ուկրօբորոնպրոմ» ընկերությունից փոխհատուցում ստանա հիմնական ռազմական տանկերի մատակարարման վերաբերյալ պայմանագիրը չիրականացնելու համար: Ինչպես գրում է «Կոմերսանտ» թերթը, պայմանագիրը ստորագրվել է նախքան Եմենում իշխանափոխությունը, սակայն դրանից հետո ուկրաինական կողմը «տեխնիկական պատճառներով» խզել է գործարքը: Համաձայնագրի մանրամասները չեն հաղորդվում:
Սալեհի կառավարման օրոք նրա եղբորորդին գլխավորում էր Եմենի զինված ուժերի 3-րդ բանակային ջոկատը: ՏԵղի Al Ahali թերթի տվյալներով՝ հիմնական մարտական տանկերի մատակարարման մասին պայմանագիրը ստորագրվել է նախագահի դեմ ապստամբության ժամանակ: Փետրվարի վերջին Սալեհը պաշտոնապես հեռացվեց իշխանությունից՝ ստանալով իր և իր ընտանիքի անվտանգության երաշխիքներ:
Իշխանափոխությունից հետո Ուկրաինան այդպես էլ չի իրականացրել գործարքը, իսկ Տարիկ Սալեհը, ինչպես նաև որպես կառավարության գործընկեր համաձայնագրի ստորագրմանը մասնակցած գործարարը, մեկել են Կիև՝ ծախսած գումարները ետ վերադարձնելու համար: Պաշտոնապես ուկրաինական կողմը Եմենի նախկին կառավարության կողմից պահանջները չի հաստատել:
ՄԱԿ-ի սովորական սպառազինությունների մատակարարման գրանցումների համաձայն՝ Ուկրաինան 2007 թվից Եմենին ռազմական տեխնիկա չի մատակարարել: Դրա հետ մեկտեղ, փորձագետների կարծիքով՝ Ուկրաինայի ռազմական մատակարարումների 40%-ը բաժին է ընկնում Մերձավոր Արևելքի և Հյուսիսայն Աֆրիկայի երկրներին:
Եթե Եմենի կողմից առաջ քաշված մեղադրանքները հաստատվեն, սպառազինությունների շուկայում Ուկրաինայի միջազգային հեղինակությանը մեծ հարված կհասցվի:
