ՀՀԿ-ական պատգամավոր Արտակ Զաքարյանը այսօր լրագրողների հետ հանդիպմանն ասաց, թե համաձայն չէ ԲՀԿ այն դիտարկումներին, որ կառավարության նախկին ծրագիրը ձախողված է եղել:
«Ես չեմ ուզում հիշեցնել, որ նույն ԲՀԿ-ն այն ժամանակ 30 տոկոսով պատասխանատվություն էր կրում այդ բյուջեի համար: Միաժամանակ, պետք է ասել, որ շատ դժվար է չլինել իշխանություն և միաժամանակ չլինել ընդդիմություն: Ուղղակի կհիշեցնեմ, որ տնտեսական ճգնաժամի ֆոնին նախկին կառավարությունը պետք է կարողանար ֆորս-մաժորային իրավիճակում հակաճգնաժամային ծրագրեր իրականացնել: Դա նշանակում էր միջոցներն ուղղել ներքին վիճակի ամրապնդմանը, ինչը մեզ հաջողվեց: Ես համոզված եմ, որ անգամ նոր ֆինանսատնտեսական ճգնաժամի պարագայում մեր տնտեսությունը կկարողանա էապես չտուժել դրանից»,- ասաց Արտակ Զաքարյանը:
Անդրադառնալով ՀՀ նախկին արտգործնախարար, ԲՀԿ պատգամավոր Վարդան Օսկանյանի հիմնադրած «Սիվիլիթաս» հիմնադրամի շուրջ ընթացող զարգացումներին՝ ՀՀԿ-ական պատգամավորը նշեց. «Ինչ որ պետք է պարզվի, պետք է պարզվի միայն իրավական դաշտում: Պարզապես քաղաքական գործիչների համար ավելի շահավետ է շահարկումների գնալ՝ պնդելով, որ իրենց հանդեպ քաղաքական հետապնդումներ են իրականացվում»:
