Քաղաքակրթական և մշակութային հետազոտությունների կենտրոնի արաբագետ Հայկ Քոչարյանն այսօր հրավիրված ասուլիսի ժամանակ խոսեց Սիրիայի ներքաղաքական զարգացումների և երկրում հայերի վիճակի մասին:
Բանախոսը նշեց, որ Սիրիայում ապրող հայերն այդ երկրի քաղաքացիներ են և ունեն ընտրության իրավունք, թե որ քաղաքական թևին պետք է հարեն. «Ընդդիմության ամենաուժեղ ներկայացուցիչը Ազգային կոմիտեն է, որին են հարում մեր հայրենակիցներից շատերը, սակայն զուտ նրա համար, որ արտահայտեն իրենց դժգոհությունը»:
Հայկ Քոչարյանն ասաց, որ չնայած մասնակցում են քաղաքական ուժերի պայքարին, սակայն չկա ինստիտուցիոնալ տարանջատում: Իսկ թե Հայաստանն ինչ պիտի անի այս իրավիճակում, բանախոսն ասաց, որ պիտի լինեին որոշակի կառույցներ, որոնք կզբաղվեին այս խնդրով, գոնե այնպես կանեին, որ Սիրիայից արտագաղթ չլիներ. «Ցավալի է, որ հայերից էլ կան զոհեր, սակայն եթե նրանք ապրում են այդ երկրում, դրանից չենք կարող խուսափել»:
