Այսօր Ազգային ժողովում քննարկվում է «Սևանա լճի մասին» ՀՀ օրենքում լրացում կատարելու մասին օրինագիծը, որով առաջարկվում է Սևանից լրացուցիչ 150 միլիոն խմ ջուր բաց թողնել: Ջրային պետական կոմիտեի նախագահ Անդրանիկ Անդրեասյանի ներկայացմամբ` այս տարի թեև ձնառատ էր, սակայն անձրևների սակավության և եղանակի միանգամից տաքանալու պատճառով ձնհալը ներծծվել է հողի մեջ, հեղեղներ չեն առաջացել, և ջրամբարները սակավաջուր են:
ՀԱԿ պատգամավոր Հրանտ Բագրատյանի խոսքով` Սևան-Հրազդան կասկադը, փաստորեն, նույնպես 150 միլիոն խմ ջուր ավելի է ստանալու, որը համարժեք է 150 հազար տոննա վառելիքի. ջուրը վերածվելու է էլեկտրաէներգիայի, այսինքն` արտադրվելու է էլեկտրաէներգիա:
Բագրատյանի հարցադրմանը, թե ինչ է գանձվելու կասկադից, Անդրեասյանը պատասխանեց` ընդամենը գանձվելու է շահութահարկ:
ՀԱԿ պատգամավոր Գագիկ Ջհանգիրյանը նկատեց, որ բաց թողնված ջուրը լցվելու է Կասպից ծով ու Արաքս, և շատ հնարավոր է, որ գյուղացիների մեծ մասը չկարողանա օգտագործել այն: Պարզ չէ, թե ինչպե՞ս է ապահովվելու ջրի օգտագործման արդյունավետությունը: Ջհանգիրյանը նաև հետաքրքրվեց, թե ինչքան պարտքեր ունեն գյուղացիները օգտագործված ջրի դիմաց:
Ա. Անդրեասյանը նշեց, որ կառավարությունը հատուկ որոշմամբ գարնանային ջրերն անհատույց տրամադրում է գյուղացիներին, իսկ այս տարի հեղեղներ չառաջացան, և ջրամբարներն էլ չլցվեցին:
«Այս ենթակառուցվածքն իսկապես իներցիոն է, բայց անցած տարիների ընթացքում միջին հավաքագրումը հասցրել են 80%-ի, սակայն համակարգը ինքնածախսածածկ չէ և բյուջեից սուբսիդավորում է ստանում: Հավաքագրումները հասել են 4 մլրդ դրամի»,- ասաց կոմիտեի նախագահը` չպատասխանելով, թե ինչքան է պարտքը:
Ջհանգիրյանը կրկնեց իր հարցադրումը և հայտարարեց` եթե ջուրը էլցանցերին, որը այլ սեփականատեր ունի, նվեր եք տալիս, գյուղացիներին էլ նվեր տվեք:
«Այդ համակարգը մերն է: Ինչքան շատ աշխատի, այնքան շատ կվճարի, և կարևոր չէ, թե ով է սեփականատերը: Մի օր կանդրադառնանք դեբիտորական պարտքին, այսօր դեռ այդ մակարդակին չենք հասել, որ այդ հարցը քննարկենք»,- նշեց Անդրեասյանը:
Ի պատասխան ՀԱԿ խմբակցության ղեկավար Լևոն Զուրաբյանի հայտարարության, թե` արդեն ջուր բաց է թողնվել Սևանից, Անդրեասյանը տեղեկացրեց, որ 100 մլն խմ ջուր է բաց թողնվել:
ՀՅԴ խմբակցության պատգամավոր Վահան Հովհաննիսյանը հանդես եկավ հարցադրմամբ` արդյոք ձկնաբուծարանների անկառավարելի և արտեզյան ջրերի անմխիթար վիճա՞կը չեն պատճառը, որ այսօր ուզում եք դիմել Սևանա լճին, և ինչպե՞ս է, որ Սիսիանի ջրամբարը լցվել է, իսկ Ախուրյանը և մյուսները` ոչ:
Ներկայում ընդմիջում է, որից հետո կշարունակվի հարցի քննարկումը:
