«ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանում տեղի ունեցած միջադեպի կապակցությամբ ոստիկանության Երևան քաղաքի վարչության պետ Ներսիկ Նազարյանի խոսքը, որտեղ անթաքույց պաշտպանության տակ Էր առել Հայրապետյանին, տարատեսակ լուրերի տեղիք տվեց»,- գրում է «Հրապարակ»-ը և հավելում.
«Լուրեր շրջանառվեցին, թե նրա գթասրտության պատճառը ոչ թե Նեմեցի հետ քավոր-սանիկական հարաբերություններն են, այլ տխրահռչակ «Հարսնաքարում» փայ ունենալը»:
Երբ թերթի թղթակիցը փորձել է Նեմեցի սանիկից ճշտել տեղեկության իսկությունը, Նազարյանը վրդովված ասել է, որ հարցազրույց կտա միայն ոստիկանության լրատվական ծառայության հետ համաձայնեցնելուց հետո, սակայն համաձայնել է պատասխանել մի հարցի: Հարցը լսելուն պես նա կրկին բորբոքվել է: «Նման հարցերի ես չեմ պատասխանի, նման հերյուրանքների բացարձակ պատասխանելու ցանկություն չունեմ»,- ասելիքն ասել ու արագ անջատել է հեռախոսը:
«Ի դեպ, համակարգում շրջանառվող լուրերի համաձայն, Ռուբեն Հայրապետյանի գործով Ներսիկ Նազարյանի ոչ իրավական պահվածքը, մեղմ ասած, չի ողջունվել վերադասի կողմից (ընդհուպ Բաղրամյան 26): Թերևս այս պատճառով էլ նա կտրուկ հրաժարվում է հարցազրույցներից, մինչդեռ երկու օր առաջ իր աշխատասենյակում սրտի թրթիռով սպասել է լրատվամիջոցների զանգերին: Ասում են՝ պատահական չէր նաև այն հանգամանքը, որ այս գործը ՊՆ-ից հետ գալու ճանապարհին մի քիչ «լռվեց» սանիկ Նազարյանի ղեկավարած վարչությունում, ապա ժամերի ընթացքում տեղափոխվեց քննչական ծառայություն:
Թերևս այսպիսով հասարակությանը փորձում են ապացուցել, թե օլիգարխի օբյեկտում տեղի ունեցած հանցագործությունն անաչառ քննության կարժանանա: Սակայն լուրեր կան, որ դա էլ է Գասպարյան-Նազարյան նեղ անձնային հարաբերություններով պայմանավորված եղել»,- ամփոփում է թերթը:
