«ՀԺ»-ն գրում է, որ 62-ամյա Ալիսա Դավթյանը երկու օր Երևանի թիվ 1 հիվանդանոցային համալիրում է անցկացրել և ուղղակի ապշած է այնտեղ ստացած վերաբերմունքից:
«Մեր թղթակցի հետ զրույցում երկրորդ խմբի ցմահ հաշմանդամ այս կինը պատմել է, որ տեսնելով բժշկական հաստատությունում իրենով զբաղվող բժիշկ չի գտնվում` երկու օր անց թողել-հեռացել է: Նա մեկ այլ բաժանմունքից տեղափոխվել էր վերակենդանացման բաժանմունք: Մեր թղթակցին Ալիսա Դավթյանը պատմել է, որ ինքը ռևմատիկ հիվանդ է, երկար ժամանակ բուժում է ստանում: Ասել է, որ ենթադրաբար իր մոտ առաջացած խնդիրները ստացած դեղորայքից են՝ թունավորում կամ ալերգիա: Կինը նախ դիմել է Սրտաբանական հիվանդանոցի «Նորք-Մարաշ» բժշկական կենտրոնի բժշկին: Այստեղ տեսնելով, որ տվյալ դեպքում ի զորու չեն օգնել Ալիսա Դավթյանին, շտապ օգնություն են կանչել, և նա տեղափոխվել է թիվ 1 հիվանդանոցային համալիր:
Նրա խոսքով, այստեղ իրեն երկու օր անընդմեջ կաթիլային ներարկում են արել՝ չորս լիտր հեղուկ, իսկ դրանից հետո տարբեր մասնագետներ են եկել և ասել, որ նա իրենց հիվանդը չէ և հրաժարվել են օգնություն ցուցաբերել: Համապատասխան բժիշկ այդպես էլ չի գտնվել: Տեսնելով այդ անտարբերությունը՝ Ալիսա Դավթյանը հեռացել է հիվանդանոցից: Նա համոզված է, որ այս ամենը պայմանավորված է իր` պետպատվերով հիվանդ լինելով: Բժիշկները, ըստ նրա, հասկացել են. որ իրենից սպասելիքներ պետք չէ ունենալ»,- ապա թերթը հավելում է.
«Այժմ նա պառկած է իր բնակարանում և այլ մասնագետների օգնությամբ է փորձում բուժվել: Ի դեպ, Ալիսա Դավթյանը նաև պատմել է, որ հիվանդանոցի վերակենդանացման բաժանմունքն այնքան մարդաշատ էր ու այնքան աղմկոտ՝ կարծես այնտեղ ծանր հիվանդներ չէին պառկած: Այս ամենին արձագանքելով` հիվանդանոցային համալիրի գլխավոր բժիշկ Կարեն Սահակյանը մեր թղթակցին ասել է, որ եթե հիվանդը դժգոհու-թյուններ ունի, կարող է դիմել իրեն: «Եթե բուժման կարիք այդ ամենը կկազմակերպվի մեզ մոտ»,- ասել է նա:
Բժիշկն, ի դեպ, տեղյակ չլինելով նշված դեպքին, զարմանք է արտահայտել, թե ինչպես կարող էր վերակենդանացման բաժանմունքի հիվանդը վեր կենալ ու գնալ: Ալիսա Դավթյանն, իմիջիայլոց. նույնպես չհ հասկանում, թե ինչու էին իրեն այդ բաժին տեղափոխել: Կարեն Սահակյանը զարմացել էր նաև, որ բողոքող հիվանդը չի զանգահարել առողջապահության նախարարության թեժ գիծ, այլ դիմել է թերթի խմբագրություն: Նշենք, որ հաշմանդամ կինն ավելի վաղ հայտնել էր, որ թեժ գիծ զանգահարել ինքը չի կարողացել՝ ենթադրելով, որ փոխվել են հեռախոսահամարները»:
