Հունիսի 15-16-ին Ֆրանսիայում ՀՀ դեսպան Վիգեն Չիտեչյանն այցելել է Ֆրանսիայի ` Ռոն-Ալպ շրջան, որը երկրի առաջնային կարևորության շրջաններից մեկն է` տնտեսական և քաղաքական ներուժի տեսանկյունից։
Այցի շրջանակներում դեսպանն առանձնազրույցներ է ունեցել շրջանային խորհրդի նախագահի, Լիոնի փոխքաղաքապետի, Վիլյորբանի և Դեսինի քաղաքապետերի, տեղի պատգամավորների, ինչպես նաև տեղական ինքնակառավարման մարմինների ներկայացուցիչների հետ։
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ Ռոն Ալպի շրջանային խորհրդի նախագահ Ժան-Ժակ Քեյրանի հետ քննարկվել է Հայաստանի համայնքների ասոցիացիայի և Ռոն-Ալպ շրջանի միջև ստորագրված համագործակցության կոնվենցիայի շրջանակներում իրականացվող աշխատանքների արդյունքներն ու առաջիկա անելիքները:
Վիլյորբանի քաղաքապետ Ժան-Պոլ Բրետի և Դեսինի քաղաքապետ Ժերոմ Ստյուլայի հետ ՀՀ դեսպանը քննարկել է Վիլյորբան-Աբովյան և Դեսին-Ստեփանավան քաղաքների տեղական ինքնակառավարման մարմինների միջև իրականացվող համագործակցության հարցերը:
Հայ համայնքային կառույցների ղեկավարների և Լիոնի քաղաքային իշխանությունների ներկայացուցիչների ուղեկցությամբ Վիգեն Չիտեչյանն այցելել է նաև Հայոց Ցեղասպանության զոհերի հիշատակը հավերժացնող հուշահամալիր` ծաղկեպսակ զետեղելու և հարգանքի տուրք մատուցելու Մեծ Եղեռնի նահատակներին։
Նույն օրը դեսպանն առանձին հանդիպումներ է ունեցել տեղի հայկական կառույցների ղեկավարների հետ` քննարկելու վերջիններիս կողմից Հայաստանի հետ իրականացվող ծրագրերը։
Հունիսի 16-ին Հայաստանի դեսպանը ներկա է գտնվել Լիոնի քաղաքապետարանի հանդիսությունների շքեղ սրահում կազմակերպված բազմամարդ ընդունելությանը, որին հաջորդել է Հայաստանում գրատպության 500-ամյակի և «Երևանը` գրքի համաշխարհային մայրաքաղաք» միջոցառումների շարքի շրջանակներում կազմակերպված Արցախին նվիրված գիտաժողով։ Բանախոսություններով հանդես եկան մի շարք պատմաբաններ և արվեստի պատմության մասնագետներ, որոնք ներկայացրել են Արցախի հարուստ մշակութային ժառանգությունը` մասնավորապես անդրադառնալով Լեռնային Ղարաբաղի ճարտարապետության, մանրանկարչության, խաչքարերի ու գորգարվեստի բացառիկ նմուշներին:
Միջոցառմանը ներկա քաղաքական, մշակութային, հասարակակական, լրագրողական ու համայնքային շրջանակների հարյուրավոր ներկայացուցչիների առջև ողջույնի խոսքերով հանդես է եկել Լիոնի քաղաքապետը և ՀՀ դեսպանը։