Ֆլորիդայի Սենֆորդ քաղաքում, որտեղ տարվա սկզբին սպանվել էր սևամորթ դեռահաս Թրեյվոն Մարտինը, սիթի մենեջերը պաշտոնից հեռացրել է քաղաքային ոստիկանության պետ Բիլ Լին, որը ժամանակավորապես վայր էր դրել լիազորությունները: Ինչպես հաղորդում է Orlando Sentinel-ը, Նորտոն Բոնապարտեն նման որոշում է կայացրել՝ չնայած Սենֆորդի վարչակազմը հրաժարվել էր հաստատել ոստիկանի հրաժարականը:
Լիի հեռացման մասին հայտարարությունը Բոնապարտեն արել է չորեքշաբթի երեկոյան: Մեկնաբանելով իր որոշումը՝ սիթի մենեջերը հայտարարել է, որ անհրաժեշտ է նշանակել «ոստիկանության այնպիսի պետի, որին աջակցեն Սենֆորդի բոլոր բնակիչները»: Ընդ որում, նա ընդգծել է Բիլ Լիի ոչ միանշանակ հեղինակությունը, որը նա ձեռք էր բերել Մարտինի հետ տեղի ունեցած միջադեպից հետո:
Քաղաքի վարչակազմի գործառույթները կատարող քաղաքային կոմիտեում Բոնապարտեի որոշումը զարմանքով են ընդունել: Բանն այն է, որ համաձայն նախորդ պայմանավորվածության՝ ոստիկանության պետին կարող էին հեռացնել միայն այն դեպքում, եթե դրա օգտին քվեարկեր կոմիտեի անդամների մեծամասնությունը: Դեռ ապրիլին տեղի ունեցած քվեարկությունը ցույց տվեց, որ վարչակազմի աշխատակիցները դեմ են հանդես գալիս Լիի հրաժարականին:
Այնուամենայնիվ, ինչպես գրում է պարբերականը, ոստիկանին հեռացնելով, Բոնապարտեն օրենք չի խախտել, քանի որ իրավունք ունի ինքնուրույն նման որոշում կայացնել: Բացի այդ, ինչպես հաղորդում է Associated Press-ը, հայտարարությանը նախորդել է սիթի մենեջերի և ոստիկանության պետի հանդիպումը, որի ընթացքում նրանք քննարկել են հետագա գործողությունները:
Բիլ Լին դեռ մարտին հայտարարել էր, որ ժամանակավորապես վայր է դնում լիազորությունները: Դրա համար առիթ էր հանդիսացել հասարակական վրդովմունքը՝ կապված հասարակական պարեկ Ջորջ Ցիմերմանի կողմից դեռահաս սևամորթի սպանության հետ, որը հասարակության լայն շրջանակների կողմից դիտարկվում էր որպես ռասայական հողի վրա սպանություն: Լին հայտնել էր, որ ցանկանում է ժամանակավորապես լքել պաշտոնը, որպեսզի հետաքննության ընթացքում իր անձի վրա ավելորդ ուշադրություն չհրավիրի: