News.armeniatv.com-ի փոխանցմամբ` հունիսի 20-ին ավազակային հարձակում է տեղի ունեցել Մուշական գյուղում: Ինչպես հայտնում է ֆոտոլրագրող Գագիկ Շամշյանը, շտապ Մուշական գյուղ է մեկնել Ոստիկանության Էրեբունու բաժնի օպերատիվ խումբը՝ Էրեբունու ոստիկանության պետ Գագիկ Գաբրիելյանի գլխավորությամբ։ Ժամանել են նաև Ոստիկանության քննչական գլխավոր վարչության Էրեբունու քննչական վարչության քննիչները՝ քննչական բաժնի պետ Արման Բայադյանի գլխավորությամբ։
Օպերատիվ քննչական խումբը պարզել է, որ ժամը 15.00-ի սահմաններում մի երիտասարդ ներս է մտել Մուշական 1 հասցեում տեղակայված «Հայփոստ» ՓԲԸ-ի թիվ 0098 բաժանմունք, որտեղ այդ պահին եղել է միայն բաժանմունքի պետը՝ Մուշական 1 փողոցի 20 տան բնակիչ 45-ամյա Արփիկ Հայրապետյանը։
Ինչպես պատմել են փոստային բաժանմունքի հարևանությամբ ապրող բնակիչները, փոստային բաժանմունքում Ա. Հայրապետյանը մենակ է եղել։ Երբ ավազակային հարձակում կատարողը մտել է ներս, հարձակվել է նրա վրա, կպչուն ժապավենով կապել բերանը և ձեռքերը, ծեծի ենթարկել նրան՝ դեմքի և գլխի մասում պատճառելով մարմնական վնասվածքներ, ինչից հետո ստիպողաբար պահանջել է գումար։ Դրանից հետո նա հափշտակել է փոստային բաժանմունքի պետի դրամապանակն ու «Նոկիա» տեսակի հեռախոսը։
Դրամապանակում եղել է 20 ԱՄՆ դոլար և 7000 դրամ։ Գ. Շամշյանի տեղեկություններով` մինչև դրամապանակը հափշտակելը, նա պահանջել է փոստում եղած գումարը, սակայն երբ նկատել է, որ փոստային բաժանմունքին են մոտենում քաղաքացիներ, դիմել է փախուստի։ Փախուստը փորձել է կասեցնել գյուղապետը՝ Սվետա Ասլանյանը, ում ևս ավազակային հարձակում կատարած անձը փախուստի ժամանակ վնասվածքներ է հասցրել:
Ոստիկանության Էրեբունու բաժնի քրեական հետախուզության բաժանմունքի և տեղամասային տեսուչները, օպերատիվ տվյալներ իրացնելով, Տիգրան Մեծի պողոտայից բերման են ենթարկել 28-ամյա Սահակ Կարապետյանին՝ նշված հանցագործությունը կատարելու կասկածանքով։
Քննիչի որոշմամբ նա ձերբակալվել է, իսկ մարմնական վնասվածքներ ստացած փոստային բաժանմունքի պետին և գյուղապետին տրվել է դատաբժշկական ուղեգիր։
Լուսանկարները՝ Գագիկ Շամշյանի
