Ռուսների կեսից ավելին (53 %) ոչինչ չի լսել ընդդիմության կազմակերպած «Միլիոնների երթի» մասին: Ինչպես տեղեկացնում է BBC-ի ռուսական ծառայությունը, այս մասին են վկայում Հասարակական կարծիքի ուսումնասիրման հիմնադրամի անցկացրած հարցումները:
Համաձայն սոցիոլոգների տվյալների` այդ ակցիաների մասին «ինչ-որ բան է լսել» ռուսների միայն 28 տոկոսը, հարցվածների 17 տոկոսը լսել է, որ դրանք միտինգ են:
Ռուսաստանի օրը` հունիսի 12-ին տեղի ունեցած «Միլիոնների երթի» մասին լսել է միայն հարցախույզի մասնակիցների 9 տոկոսը:
Նրանցից, ովքեր լսել են բողոքի ակցիաների մասին, 13 տոկոսն ասել է, որ դրական է վերաբերվում նման երթերին, 14 տոկոսը` հակառակը՝ ընդդիմության քայլին տվել է բացասական գնահատական:
Հասարակական կարծիքի ուսումնասիրման հիմնադրամի տվյալների համաձայն` «Ռուսաստանն առանց Պուտինի» կարգախոսին հարցվածների 54 տոկոսը չի աջակցել, միայն նրանց քառորդ մասն է կարգախոսին տվել դրական գնահատական, 24 տոկոսը չի կարողացել արտահայտել իր վերաբերմունքը:
