ԴԱՀԿ–ի պետ Միհրան Պողոսյանը, որը նաև «Ֆրեշ» սուպեմարկետների ցանցի սեփականատերն է, այժմ փորձում է սպառնալիքների միջոցով ձեռագիր վկայություն ստանալ իր նախկին երկու աշխատողներից, որ նրանք ծեծի չեն ենթարկվել: Նշենք, որ աշխատողներից մեկն արդեն գրել է այդ վկայությունը, իսկ երկրորդը` դեռ ոչ:
Սակայն այժմ Միհրան Պողոսյանը լուրջ խնդրի առջև է կանգնել: Երկրորդ աշխատակիցը դիմել է երևանաբնակ մի «օրենքով գողի» օգնությանը` Միհրան Պողոսյանի սպառնալիքները չեզոքացնելու համար: Դեռևս դժվար է ասել, թե ինչպես կավարտվի այս կոնֆլիկտը:
Հիշեցնենք, որ ինչպես արդեն հաղորդել էր «Առաջին լրատվականը», գիշերային հերթափոխի տղաները «Ֆրեշ» ցանցի սուպերմարկետներից մեկում փորձարկել են կշեռքները։ Արդյունքում նրանք սպառողների զանգվածները մինուսով են կշռել. Օրինակ` զանգվածը 500 գրամի փոխարեն, սպառողներին է հասել 400 գրամ։
Այս ամենը սուպերմարկետի ղեկավարությունը նկատել է և զեկուցել Միհրան Պողոսյանին, որն էլ վերջիններիս պատժելու հրահանգ է իջեցրել, սակայն ոչ թե իրավական, այլ «ավելի մոդայիկ» եղանակներով, ինչից հետո տնօրենը և սուպերմարկետի հսկիչները տղաներին տարել են տնօրենի կաբինետ և արնահոսելու աստիճան ծեծել, ապա` հեռացրել աշխատանքից` չվճարելով նրանց աշխատավարձը։
Հիշեցնենք նաև, որ Արդարադատության նախարարությունը վերջերս հաղորդագրություն էր տարածել այն մասին, որ Միհրան Պողոսյանը չի ծեծել ԴԱՀԿ-ի աշխատակիցներից մեկին` հերքման տեքստին կցելով այդ աշխատակցի ձեռագիր վկայությունն այն մասին, որ Միհրան Պողոսյանն իրեն ծեծի չի ենթարկել և որ ինքը աշխատանքից ազատվել է սեփական դիմումի համաձայն:
