Չինաստանի իշխանությունները Ռուսաստանից և Սիրիայից հետո հերքել են օրերս տարածված այն տեղեկությունները, որ իբր մոտ ժամանակները Ռուսաստանը, Իրանը, Չինաստանը և Սիրիան վերջինիս տարածքում խոշոր զորավարժություններ են պատրաստվում անցկացնել: Այս մասին հաղորդում է Xinhua գործակալությունը՝ վկայակոչելով Չինաստանի ԱԳՆ-ն:
Ավելի վաղ իրանական ԶԼՄ-ները և արաբական հեռուստաալիքները հայտնել էին, որ այդ երկրները պատրաստվում են զորավարժություններ անցկացնել Սիրիայի տարածքում: Հաղորդվում էր նաև, որ Եգիպտոսը թույլատրել է, որ Սուեզի ջրանցքով 12 չինական նավ անցնի:
«Այդ հաղորդագրությունը ոչ մի հիմք չունի»,- հայտարարել է Չինաստանի ԱԳՆ պաշտոնական ներկայացուցիչ Հուն Լեյը:
Հիշեցնենք, որ ավելի վաղ այդ տեղեկությունը հերքել էր Սիրիայի նախագահի քաղաքական և տեղեկատվական հարցերով օգնական Բուսեյնա Շաաբանը և Ռուսաստանի Պաշտպանության նախարարությունը:
