Սիրիայի ապստամբները երկրի հյուսիս-արևմուտքում՝ Լաթաքիա մարզում տեղի ունեցած մարտերում սպանել են կառավարական զորքերի ավելի քան 20 զինծառայողի: Այս մասին հաղորդում է Agence France-Presse-ը՝ վկայակոչելով ընդդիմության աղբյուրներին:
Ըստ այդ տեղեկությունների՝ ևս 8 զինծառայող սպանվել է լեռներում տեղակայված զինվորական անցակետերի վրա հարձակումների հետևանքով: 5 զինվոր սպանվել է Իդլիբ մարզում ականապատ մեքենայի պայթյունից:
Երկրի կենտրոնում՝ Համա մարզում, որտեղ արդեն մի քանի ամիս է՝ բախումները չեն դադարում, մեկ օրում սպանվել է 3 զինծառայող:
Ապստամբները հայտարարում են, որ Լաթաքիայի մարտերում իրենց հաջողվել է պատանդ վերցնել մի քանի զինծառայողների, այդ թվում՝ մեկ սպայի, ինչպես նաև վերցնել մեծ քանակությամբ զենք և զինամթերք: Ընդ որում, իրենց կորուստները ընդդիմադիրները մեկ օրում գնահատում են 5 մարդ:
Սիրիայի պաշտոնական Sana գործակալությունը իր հերթին գրում է, որ վերջին մեկ օրում կառավարական զորքերը Ռաստան քաղաքում ոչնչացրել են «մեծ քանակությամբ զինյալների», որոնց մոտից առգրավել են ինքնաձիգներ, նռնականետեր, ականանետեր և զինամթերք: Զինծառայողների շրջանում վերջին կորուստների մասին գործակաությունը ոչինչ չի հաղորդում:
Բացի այդ, հաղորդվում է, որ Դամասկոսում սպանվել է հայտնի քարոզիչ Սայիդ Զեյնաբը: Նրա մահը որոշ փորձագետներ գնահատում են որպես միջկրոնական պատերազմի հետագա զարգացման նշան. Սիրիայի շիաները հիմնականում աջակցում են Բաշար Ալ-Ասադի կառավարությանը, իսկ սուննիների մեծամասնությունը դեմ է հանդես գալիս նրան:
Իմամի սպանության համար դեռ ոչ ոք պատասխանատվություն չի ստանձնել:
Իրավապաշտպանների գնահատականներով՝ Սիրիայի հակամարտության 15 ամիսների ընթացքում երկրում զոհվել է շուրջ 15 հազար մարդ, հիմնականում՝ քաղաքացիական անձինք:
