Դոլարի արժևորումը կարճաժամկետ հատվածում ոչ մի ազդեցություն չի կարող ունենալ արտահանման ծավալների ավելացման վրա: «Առաջին լրատվական»-ի հետ զրույցում հայտնեց «Ժողովրդի իշխանություն» հասարակական-քաղաքական նախաձեռնության խորհրդի անդամ, տնտեսագետ Մովսես Արիստակեսյանը: Ըստ նրա՝ դրամի արժեզրկումը միջին և երկար ժամկետում կարող է բարերար ազդեցություն ունենալ արտահանման ծավալների վրա:
«Ներկայում Հայաստանում գրեթե չկա այնպիսի արտադրություն, որն ուղղված լինի դեպի արտահանում, քանի որ նախորդ ժամանակահատվածում դրամի արժևորում էր գնում, ինչը բոլորովին չէր խթանում տեղական արտադրողին այնպիսի արտադրանք արտադրելու, որ միտված լիներ արտահանման: Դրամի արժեզրկումը կամ դոլարի արժևորումը եթե երկարաժամկետ պահպանվի, կարող է ազդել արտահանման վրա, բայց միայն այն դեպքում, եթե ունենք իրոք կայուն տնտեսական զարգացում և արտահանմանն ուղղված արտադրություն՝ հատկապես փոքր ու միջին բիզնեսում, որ հուսալիորեն դեպի ապագա նայեն ու իմանան, որ կարող են շարունակել, և հակառակ գործընթաց չի սկսվի»,- ասաց Մ.Արիստակեսյանը:
