«Երեկ Աժ տնտեսական հարցերի մշտական հանձնաժողովը գումարել էր այս նստաշրջանում իր անդրանիկ նիստը: Մի շարք նորընտիր պատգավորներ գուցե սրտացավությամբ, գուցե աչքի ընկնելու մտադրությամբ առաջարկել են սահմանամերձ համայնքներին շատ ավելի լայն արտոնություններ տալ, քան նախատեսվում է»,- գրում է «Ժողովուրդ»-ը և հավելում.
«Իհարկե, սա առաջին դեպքը չէ, որ նման լուրջ քննարկում է արվում: Իսկ ինչ է փոխվում դրանից Հայաստանում: Փաստն այն է, որ մինչ մայրաքաղաքում նստած չինովնիկները հեռակա կարգով փորձում են որոշել սահմանամերձ համայնքների ճակատագիրը, գյուղերը դատարկվում են մտահոգիչ արագությամբ: Տավուշի մարզի Բարեկամավան գյուղն Ադրբեջանին սահմանակից ամենամոտ բնակավայրն է: Համայնքի ղեկավար Գարիկ Աբազյանը «ժողովուրդ»-ին հայտնել է, որ 2008թ. -ին Բարեկամավանի բնակչության թիվը 595 էր, իսկ 2012-ի մայիսի դրությամբ թիվը նվազել է՝ դառնալով 335 մարդ:
Այսինքն՝ վերջին 4 տարում 260 մարդ անվերադարձ լքել է համայնքը: «90-ական թվականներին համայնքի ութամյա դպրոցում սովորում էր 330, իսկ այսօր՝ 34 աշակերտ: Համայնքում վիճակն աղետալի է»,-ասել է գյուղապետը: Համայնքի հիմնախնդիրների մասին խոսելով` Աբազյանը կարծիք է հայտնել.
«Ավելի հեշտ կլինի ասել՝ համայնքում ինչ կա, քան ինչ չկա, որովհետև գրեթե ոչինչ էլ չկա»:
