Փետրվարի 5-ից ուժի մեջ է մտել Մաքսային օրենսգրքում կատարված փոփոխությունները, համաձայն որոնց` Վրաստանի պետհամարանիշերով մեքենաները պետք է 15 օրվա ընթացքում մաքսազերծվեն և ստանան հայկական պետհամարանիշեր, հակառակ դեպքում, վրացական պետհամարանիշերով ավտոմեքնենաները իրավունք չեն ունենա երթևեկելու ՀՀ տարածքում:
Այս որոշումը հենց ուժի մեջ մտնելու օրվանից` փետրվարի 5-ից, փողոց է հանել գյումրեցի վարորդների մեծ մասին, ովքեր նշում են, թե այս որոշումն անհիմն է, քանզի օրենսգրքով սահմանված մաքսազերծման տոկոսադրույքներն այնքան բարձր են, որ մեքենայի մաքսազերծումը հավասար է հենց մեքենայի արժեքին: Վարորդների խոսքերով, Հայաստանում մաքսազերծումը միջին հաշվով 7-8 անգամ ավելի թանկ է, քան Վրաստանում:
Այսօր վարորդները փակել էին Գյումրիի մարզպետարանի դիմացի պողոտան և սպասում էին մարզպետին, որն այդպես էլ չմոտեցավ նրանց: Այնուհետև վարորդները մոտ մեկ ժամով փակեցին Երևան-Գյումրի մայրուղին, որից հետո բողոքի ակցիան շարունակեցին Գյումրիի գլխավոր հրապարակում: Այստեղ ակցիային միջամտեցին ոստիկանները և առաջարկեցին գնալ ոստիկանության մարզային վարչություն և վարչության պետի աշխատասենյակից զանգահարել վարչապետ Տիգրան Սարգսյանին և ներկայացնել խնդիրը:
Սակայն, ինչպես հետագայում տեղեկացրին ոստիկանություն գնացած վարորդները, ոչ մի նման բան չի եղել:
Վաղը` ժամը 10-ին, վարորդները կրկին հավաքվելու են Գյումրիի կայարանամերձ հրապարակում: Նրանց պահանջը հստակ է` փոխել կառավարության որոշումը կամ իջեցնել մաքսատուրքերը և վերջ տալ «այս խուժանությանը»:
Ակցիայի մասնակից վարորդների մեծ մասը կոչ արեց, գնալ Բավրայի մաքսակետ, ավելին` գնալ Վարստան և դառնալ այնտեղի քաղաքացի ու իրենց խնդիրները ներկայացնել Միխեիլ Սահակաշվիլիին:
