Հունիսի 19-ին ավտովթար է տեղի ունեցել Արագածոտնի մարզում։ Ինչպես դեպքի վայրից News.armeniatv.com–ին հայտնել է ֆոտոլրագրող Գագիկ Շամշյանը, ժամը 21.00-ի սահմաններում «ԲՄՎ» մակնիշի 11 OO 656 համարանիշի ավտոմեքենայի վարորդը Երևան–Գյումրի ավտոճանապարհին՝ դեպի Աշտարակ ուղևորվելիս դուրս է եկել հանդիպակաց երթևեկելի գոտի, բախվել բետոնե արգելապատնեշներին և մոտ 50 մետր գլորվելով՝ գլխիվայր շրջված վիճակում հայտնվել դաշտում։ Վթարի հետևանքով մի երիտասարդ աղջիկ ծանր մարմնական վնասվածքներով տեղափոխվել է Աշտարակի հիվանդանոց։ Դեպքի վայրում հավաքվածները ֆոտոլրագրողին պատմել են, որ հիվանդանոց տեղափոխվածը Արագածոտնի մարզի Նոր Եդեսիա գյուղի (4-րդ սովխոզ) բնակիչ, 22-ամյա Նուշիկ Վարդանյանն է։ Դեպքի վայր են ժամանել Ոստիկանության Աշտարակի բաժնի օպերատիվ–քննչական խումբը՝ Ոստիկանության քննչական գլխավոր վարչության Արագածոտնի մարզի քննչական բաժնի քննիչ Արամ Խալաթյանի գլխավորությամբ։ Դեպքի վայրում են նաև Ճանապարհային ոստիկանության 2–րդ սպայական գումարտակի 2–րդ վաշտի 2–րդ դասակի մի քանի աշխատակիցներ՝ ավագ տեսուչ Հարություն Հարությունյանի գլխավորությամբ։ Դեպքի վայրում են նաև Արտակարգ իրավիճակների նախարարության Արագածոտնի մարզի հրշեջ–փրկարարները, քանի որ վթարված «ԲՄՎ»–ից գազի ուժեղ արտահոսք կար, ինչը վտանգ էր ներկայացնում։ ՃՈ աշխատակիցները կարողացել են կանխել գազի արտահոսքը։
Լուսանկարները՝ Գ․Շամշյանի
