Հունիսի 17-ին Լեռնանցք գյուղի բնակիչ 14-ամյա Արտյոմ Վարդանյանը կախվելու միջոցով ինքնասպանություն էր գործել: Որդուն նկուղում կախված տեսնելով՝ մայրը ոստիկանությունում ցուցմունք տալուց հետո տուն չէր վերադարձել: Երեկ ուշ երեկոյան նա տուն է վերադարձել, սակայն չի ասել, թե որտեղ է անցկացրել այդ 2 օրը։
Այսօր 14-ամյա պատանուն հուղարկավորել են: Ականատեսները պատմում են, որ մայրը հանգիստ է եղել, արտառոց բաներ իրեն թույլ չի տվել, պատմել է իր հիշողության մեջ պահած հետաքրքիր պահերը: Իսկ ավելի շատ մայրը հիշել է, թե ինչպես էր որդին իր ընկերների հետ հոգում տան հոգսերը. «Իմ տան տղամարդն էր, շատ էր երազում մեքենայով գնալ քաղաք ու տան համար պահանջվող իրերը միանգամից գնել»: Արտագնա աշխատանքում գտնվող հորը հատուկ խնդրել էր, թե «ոչ մի բան չեմ ուզում, կգաս, մեքենա կգնես, իսկ մինչ այդ ես վարել կսովորեմ»:
Հայրն էլ հիշում էր, որ վերջին հեռախոսազրույցի ընթացքում Արտյոմն ասել էր, որ հարևան Ավետի ավտոն խփել է պատին, 100 դոլար էր խնդրել հորից, որ սարքել տա: Այդ խնդրանքն էլ հայրը չէր հասցրել կատարել:
Մինչև հուղարկավորությունը Արտյոմի 11-ամյա քույրը մի քանի անգամ ուշագնաց էր եղել: Նրան նորեկ հարևանի տուն էին տարել:
Թեև ոստիկաններն ու բժիշկներն արգելել էին, բայց հուղարկավորությանը մասնակցել է նաև դասընկեր Հարութը: Նա դեռևս չի կարողանում խոսել:
