Իսրայելի պաշտպանության նախարար Էհուդ Բարաքը Եգիպտոսի իշխանություններից պահանջել է վերականգնել հսկողությունը Սինայի թերակղզում, որտեղից այսօր զինյալներ են ներթափանցել Իսրայելի հարավ և սպանություններ իրականացրել:
Ավելի վաղ հաղորդվում էր, որ երկու անօրինական սահման հատողներ, ենթադրաբար պաղեստինցիներ, սպանվել են զինվորականների հետ տեղի ունեցած փոխհրաձգության ժամանակ: Էհուդ Բարաքը տեղի ունեցածն անվանել է Սինայում Եգիպտոսի հսկողության թուլացման հերթական նշան և Կահիրեին կոչ արել վերջ դնել հակաիսրայելական պոռթկումներին:
Նախարարի խոսքերով՝ իրենք հույս ունեն, որ նորընտիր նախագահը, ով էլ նա լինի, իր վրա կվերցնի Եգիպտոսի միջազգային պարտավորությունները և անվտանգության միջոցառումներ կձեռնարկի Սինայի թերակղզում:
Հանգստյան օրերին Եգիպտոսում տեղի է ունեցել նախագահական ընտրությունների երկրորդ փուլը: Նախնական տվյլաներով՝ հաղթել է «Մուսուլման եղբայրներ»-ի ներկայացուցիչ Ահմեդ Շաֆիկը: Ընտրությունների վերջնական արդյունքները կհրապարակվեն հունիսի 21-ին:
Հիշեցնենք, 2011թ. Եգիպտոսում տեղի ունեցած զանգվածային ցույցերից և երկրում դրության ապակայունացումից հետո խիստ թուլացել է կենտրոնական իշխանությունների վերահսկողությունը Սինայի թերակղզում, ինչը բազմիցս առաջացրել է Իսրայելի իշխանությունների դժգոհությունը:
