Կիրակի ԱՄՆ-ի նախագահական ընտանիքը նշել է Հայրիկների տոնը: Օրվա առիթով առաջին տիկին Միշել Օբաման տեսանյութով պատմել է, թե ինչպես է նախագահ Օբաման ներգրավված իր երեխաների կյանքում:
«Բարաքը հիանալի հայրիկ է: Ամեն օր նա ջանք ու եռանդ չի խնայում լինելու այնպիսի հայրիկ, ինչպիսին չի ունեցել»:
Վաղ հասակում Օբամային հայրիկը լքել է: Նրան մեծացրել են մայրը և Հավայայում բնակվող տատն ու պապը: Կյանքի այդ դիպվածը դարձել է Օբամայի «Երազանքներ իմ հայրիկից» գրքի թեման: Միշել Օբամայի խոսքով՝ Բարաքն իր դուստրերին՝ Մալիային ու Սաշային այլ կերպ է մեծացնում:
«Նախագահ Օբաման մասնակցում է երեխաների հետ կապված այն ամենին, ինչին հասցնում է՝ համերգների, խաղերի և այլն: Նա կարծում է, որ աղջիկների համար շատ կարևոր է ունենալ սեր և աջակցություն իրենց կյանքի ամենակարևոր մարդուց՝ հայրիկից: Մենք գրեթե ամեն գիշեր միասին ընթրում ենք: Երբ հավաքվում ենք սեղանի շուրջ, նա դադարում է լինել ԱՄՆ նախագահ Բարաք Օբամա, նա Մալիայի և Սաշայի հայրիկն է: Ես հպարտանում են Բարաքով ոչ միայն այն բանի համար, որ նա հիանալի նախագահ է, այլ այն բանի համար, որ նա նվիրված հայրիկ է»,- տեսանյութում պատմել է առաջին տիկինը:
Twitter միկրոբլոգների ծառայությունում տարածած հաղորդագրության մեջ Միշելը երախտիքի խոսքեր է հղել երկու սիրելի հայրիկներին՝ մեկին, որն իրեն մեծացրել է, և մյուսին, որի հետ ամուսնացել է: Օրվա առիթով Միշել Օբաման շնորհավորել է բոլոր հայրերին:
