Թարգմանիչ, «ԱրտԳրականություն» հանդեսի գլխավոր խմբագիր Սամվել Մկրտչյանը Facebook-ի իր էջում հունիսի 4-ին մի գրառում է կատարել`5 րոպե՝ քնելուց առաջ.
Քնելուց առաջ Հայրենիքի մասին 5 րոպե մտածելու՝ Անդրանիկի միտքը Եղեռնից (եթե չասեմ 451 թվից) ի վեր հայոց իրականությանն ուղղված ամենասթափ և ամենահրատապ արտահայտությունն է: Ամերիկացուն ու եվրոպացուն սա պետք չէ. նրանց մասին «մտածված» է:
Մեր 5 րոպեն ենթադրում է, որ դու, հայ մարդ, 5 րոպե մտածելով՝ 5 րոպե զրկես քեզ ինքնախաբեությունից, պարտադիր խելոք երևալուց, ընդդիմադիր ու իբր պետականամետ լինելուց թե ձևացնելուց, դզած-փչած բանաստեղծություններ գրելուց , դատարկ «դիսկուրս»-ներից, մեծամտությունից, բազմազանության ու հանդուրժողականության քարոզներից, հեռուստատեսային երգացավից ու աստղացավից, խոհանոցամոլությունից, ամեն տեսակի վերվարածներից… Նոր Թվականության 2012 թվին, հերթական բեկումնային ժամանակահատվածում, հայը կանգնած է գերագույն ընտրության առջև. կամ ստեղծել պետություն ու արժանավայել ապրել, կամ վերանալ որպես ազգ:
Մեզ ամեն օր ստորացնում են՝ մենք մարդու «հիմնարար» իրավունքներ, նույնասեռական, աղանդավոր ու ազգայնամոլ (չշփոթել «ազգայնական»-ի հետ) ենք տռացնում (Վերջին մի ամսում ուրվագծվեց հայաստանյան նույնասեռականների մարտնչող-դասալիք և պրոֆեսիոնալ-վճարովի գումարտակը): 2 միլիոն դարձող ազգի համար 10 տոկոսանոց յուրաքանչյուր ցուցանիշ կարող է աղետ դառնալ:
Ուզո՞ւմ ենք աշխարհում մեր արժանավայել տեղն ունենալ՝ 5 րոպե զրկենք մեզ մեր կայֆերից, վիճարկենք այն ամենն, ինչ պարտադրված է՝ դրսից թե ներսից: Մի քիչ զսպենք մեզ. թե չէ չտեսի պես վրա ենք պրծել ամեն տեսակի աղբի վրա: Տանը աղբ չեն հավաքում, նույնիսկ եթե հակառակը պահանջեն կասկածելի վարքի տեր աշխարհակալները: Ես հանդուրժող կլինեի որոշ այլակյաց երևույթների հանդեպ, եթե ունենայինք քաղաքացիական հասարակություն: Քանի դեռ չունենք՝ հանդուրժողականությունը նպաստելու է սպանիչ «բեսպրեդելին»՝ միահեծան մի երկրում, որտեղ նախագահի նազիր-վեզիրները (խորհրդականից մինչև նախարար ու օլիգարխ կոչեցյալը) պատրաստ են նույնիսկ նրա փռշտոցը նմանակել: Քո բաժին ներդրումն ունեցիր՝ վերջ տալու ապիկարության ու այլասերության այս շքահանդեսին: 5 րոպեանոց ներդրում:
