ԱՄՆ նախագահական ընտրություններում Հանրապետական կուսակցության թեկնածու Միթ Ռոմնին հայտարարել է, որ Իսրայելի հանդեպ իր քաղաքականությունը հակադրվելու է Օբամայի նախաձեռնած գործողություններին: Ինչպես փոխանցել է Newsru.co.il-ը, նման հայտարարությամբ քաղաքական գործիչը հանդես է եկել քրիստոնյա ավետարանչականների հետ հանդիպման ժամանակ:
Այն հարցին, թե նախագահ ընտրվելու դեպքում Միթ Ռոմնին ինչ քայլեր է ձեռնարկելու ԱՄՆ-ի և Իսրայելի կապերն ամրապնդելու համար, Ռոմնին պատասխանել է. «Ես կարծում եմ՝ պետք նայել, թե ինչ է այդ կապակցությամբ անում ներկայիս նախագահը և անել դրա հակառակը»:
Տեղական ԶԼՄ-ների փոխանցմամբ` նրա այս արտահայտությանն արձագանքել են ծիծաղով և ծափահարություններով:
Ռոմնիի խոսքերով` Օբաման ավելի շատ վախենում է նրանից, որ Իսրայելը պատերազմ կսկսի Իրանի դեմ, քան նրանից, որ Իրանը կարող է վերածվել միջուկային պետության:
Ռոմնին նաև ասել է, որ մտադիր է ամուր աշխատանքային հարաբերություններ հաստատել իսրայելական ղեկավարության հետ:
