Ուրախալի փաստ է, որ նոր կառավարության անդամների թվում կա նաև մեկ անկուսակցական նախարար: «Առաջին լրատվական»-ի հետ զրույցում նման տեսակետ հայտնեց սոցիոլոգ Ահարոն Ադիբեկյանը:
«Սա նշանակում է, որ մեզ մոտ ամեն ինչ քարացած չէ, ճկուն մոտեցումներ կան: Նշանակում է, որ նրան ընտրել են մասնագիտական կարողությունների համար»,- ասաց նա՝ հավելելով, որ թեպետ կառավարության կազմը մեծամասամբ կրկնվում է, սակայն միտում կա, որ նորանշանակ նախարարները լավ կաշխատեն:
Ահարոն Ադիբեկյանի խոսքով՝ մի փոքր վիճարկելի կարող է լինել Երևանի նախկին քաղաքապետ Գագիկ Բեգլարյանի՝ կապի ու տրանսպորտի նախարարի պաշտոնում նշանակումը: «Սա ներքին խմորումների արտացոլում է, թեպետ արտաքուստ ոչինչ չի երևում: Բոլոր դեպքերում Գագիկ Բեգլարյանը, որպես քաղաքապետ, իրեն այնքան էլ վատ չէր դրսևորում և որպես նոր նախարար՝ հուսով եմ, կշարունակի լավ աշխատել»:
Հիշեցնենք, որ Հայաստանի հանրապետական կուսակցության՝ երեկ կայացած Գործադիր մարմնի նիստից հետո որոշվել է կառավարության կազմը:
Ըստ այդմ՝ տարածքային կառավարման նախարարի պաշտոնը զբաղեցնելու է Արմեն Գևորգյանը
աշխատանքի և սոցիալական հարցերի նախարարինը` Արտեմ Ասատրյանը, առողջապահության նախարարինը` Դերենիկ Դումանյանը, արդարադատության նախարարինը` Հրայր Թովմասյանը, արտաքին գործերի նախարարինը` Էդվարդ Նալբանդյանը, բնապահպանության նախարարինը` Արամ Հարությունյանը, էկոնոմիկայի նախարարինը` Տիգրան Դավթյանը, էներգետիկայի և բնական պաշարների նախարարինը` Արմեն Մովսիսյանը:
Կրթության և գիտության նախարար է նշանակվել Արմեն Աշոտյանը, մշակույթի նախարար` Հասմիկ Պողոսյանը, պաշտպանության նախարար` Սեյրան Օհանյանը, սփյուռքի նախարար` Հրանուշ Հակոբյանը, տրանսպորտի և կապի նախարար` Գագիկ Բեգլարյանը, ֆինանսների նախարար` Վաչե Գաբրիելյանը:
Արտակարգ իրավիճակների, գյուղատնտեսության և քաղաքաշինության նախարարությունները տրվել են կոալիցիոն գործընկեր «Օրինաց երկիր» կուսակցությանը:
Նշենք, որ արտակարգ իրավիճակների նախարար մնալու է Արմեն Երիցյանը, իսկ գյուղատնտեսության նախարար` Սերգո Կարապետյանը:
Սպորտի և երիտասարդության հարցերի նախարարի անունը հայտնի կդառնա կառավարության նիստի ժամանակ:
