Թուրքական Hürriyet թերթին տված հարցազրույցում Դիարբեքիրից թուրքական խորհրդարան անցած քուրդ անկախ պատգամավոր և իրավապաշտպան Լեյլա Զանան հայտարարել է, որ իր կարծիքով՝ վարչապետ Ռեջեփ Էրդողանը կարող է երկրում լուծել քրդական հարցը.
«Ես դեռ հույսեր ունեմ, որ Էրդողանը կարող է խաղաղ ճանապարհով և արդյունավետ լուծել քրդական հարցը: Եկեք այդ մասին բաց խոսենք և ընդունենք այն փաստը, որ ամենաուժեղ մարդը կարող է լուծել այդ հարցը: Ո՞վ է նա: Դա կառավարությունն է ու նրա ղեկավար Ռեջեփ Էրդողանը: Մարդը, որը գլխավորում է Թուրքիայի պատմության մեջ ուժեղագույն կառավարությունը, ունի իշխանություն և կարող է կամքի ուժ ցուցաբերել այս հարցը կարգավորելու համար:
Ես կարծում եմ, որ նա կարող է լուծել այդ խնդիրը: Ես երբեք հավատս չեմ կորցրել դրա նկատմամբ, և այժմ էլ չեմ ցանկանում կորցնել այն: Եթե ես այն կորցրած լինեի, ապա այստեղ չէի լինի: Էրդողանը քրդական հարցի արդյունավետ լուծման համար պետք է բանակցություններ վարի քուրդ քաղաքական գործիչների ու մտավորականների հետ»:
Հիշեցնենք, որ մայիսի 24-ին Դիարբեքիրի ծանր հանցագործությունները քննող 5-րդ դատարանը 10-ամյա ազատազրկման դատապարտեց Լեյլա Զանային: Դրա պատճառն այն է, որ նախորդ տարի խորհրդարանում երդում տալուց հետո Լեյլա Զանան խոսել էր քրդերեն, քրդերեն էր հնչել նաև մարտին Նովրուզի կապակցությամբ նրա ելույթը: Լեյլա Զանան Թուրքիայի խորհրդարանում հայտնված առաջին քրդուհին է (1991 թվական, Դիարբեքիր):
