Միացյալ ազգերի կազմակերպության Անվտանգության խորհուրդը համաձայն չէ Արևմտյան Աֆրիկայի երկրների տնտեսական միության այն առաջարկին, որով նախատեսվում է ռազմական միջամտություն իրականացնել Մալիում։ ՄԱԿ-ի ԱԽ դիվանագետներն անցկացրել են փակ հանդիպում, որի ժամանակ քննարկել են հնարավոր ռազմական միջամտության տարբերակները և դիմել են Միությանն ավելի մանրամասն տեղեկություններ տրամադրելու համար։ Այս մասին հաղորդում է Reuters-ը։
Հիշեցնենք, որ մարտի վերջին Մալիում տեղի է ունեցել ռազմական հեղաշրջում, որի հետևանքով իշխանությունից զրկվել էր երկրի գործող նախագահը։ Դրանից հետո տուարեգների ցեղախմբերը հայտարարեցին կենտրոնից իրենց անկախության մասին։ Իրավիճակն այս երկրում սրվել էր այն բանից հետո, երբ Լիբիայում տեղի ունեցավ հեղափոխություն։ Այն տուարեգները, որոնք կռվում էին Քադաֆիի կողմից, վերջինիս տապալումից հետո միացան անկախականներին, որից հետո տեղի ունեցավ նաև համաձայնություն իսլամիստական ուժերի հետ։