Ինչպես հաղորդում է Associated Press գործակալությունը, Թունիսի ներքին գործերի նորանշանակ նախարար Ֆարհադ Նաջդին դադարեցրել է նախկին իշխող կուսակցության` Ժողովրդավարական սահմանադրական միավորման գործունեությունը, որը գլխավորում էր նախկին ղեկավար Զին Ալ-Աբիդին բեն Ալին:
Ըստ գործակալության հայտնած տեղեկությունների` դադարեցվել է կուսակցության բոլոր գրասենյակների և ներկայացուցչությունների գործունեությունը, կուսակցությանն արգելվել է հավաքների անցկացումը:
Հիշեցնենք, որ հունվարի 14-ին Թունիսում տեղի էր ունեցել հեղափոխություն, որի արդյունքում գործող նախագահ Զին Ալ-Աբիդին բեն Ալին լքել էր երկրի տարածքը: Սակայն դրանից հետո բախումները չեն դադարել։ Հանրահավաքների ժամանակ ցուցարարները պահանջել են ամբողջությամբ հրաժարվել նախկին ղեկավարությունից, ինչպես նաև սոցիալական հարցերին արագ լուծումներ տալ: