2014թ. հետո ՆԱՏՕ-ի և ԱՄՆ-ի զորքերի՝ Աֆղանստանից դուրս գալուց հետո ամերիկյան ռազմական տեխնիկան կարող է մնալ Միջին Ասիայի պետություններում, գրում է ռուսական «Կոմերսանտ» թերթը:
Թերթին հայտնի է դարձել, որ Պենտագոնը այդ հարցով փակ բանակցություններ է վարում Ղրղըզստանի, Ուզբեկստանի և Տաջիկստանի հետ: Այդ ծրագրի իրագործումը ԱՄՆ-ին հնարավորություն կտա Մոսկվայի թիկունքում ամրապնդել ռազմական համագործակցությունը Հավաքական անվտանգության պայմանագրի կազմակերպության (ՀԱՊԿ) անդամների հետ:
Ռուսաստանի դիվանագիտական շրջանակներում թերթի աղբյուրը այդ տեղեկությունն ընդունել է «ծայրահեղ շփոթվածությամբ»: «Ռուսաստանի համար այդպիսի սցենարը միանգամայն անընդունելի է, քանի որ այն հակասում է Կենտրոնական Ասիայի մեր գործընկերների հետ պայմանավորվածություններին և ակնհայտորեն հակասության մեջ մտնում ՀԱՊԿ շրջանակներում համաձայնագրերին»,- ասել է «Կոմերսանտի» զրուցակիցը:
Նա հայտնել է, որ խոսքը զրահամեքենաների, ծանր տեխնիկայի տեղափոխման թրեյլերների մասին է: Բացի դրանից՝ Պենտագոնը պատրաստ է Աֆղանստանի հարևաններին տալ բժշկական սարքավորումներ, կապի, հրդեհամարման միջոցներ, ինչպես նաև շարժական մարզասրահներ և ռազմական կենցաղի ապահովման համար այլ սարքավորումներ:
Մոսկվայի համար նման սցենարի իրականացումը կնշանակի, որ սպառազինության կենտրոնասիական շուկայում կառաջանա նկատելի ամերիկյան սեգմենտ, գրում է պարբերականը:
Դա իր հետ կբերի մասնագետների ուսուցման, պահեստամասերի մատակարարման, արդիականացման պահանջարկ, ինչը կհանգեցնի այն բանին, որ ՀԱՊԿ-ում Մոսկվայի գործընկերները կհարմարվեն ամերիկյան ռազմական տեխնիկային: