ԼՂՀ-ն կարող է հանդես գալ որպես տարածաշրջանի ամենաժողովրդավար ու քաղաքակիրթ երկիրը. այսօր լրագրողների հետ հանդիպմանը նկատեց սոցիոլոգ Ահարոն Ադիբեկյանը՝ ընդգծելով, որ կոնկրետ նախագահական ընտրություններից առաջ այնտեղ կաշառք բացարձակապես չի բաժանվում:
Խոսելով Արցախում հուլիսի 19-ին կայանալիք նախագահական ընտրությունների մասին՝ նա բավական խորքային զարգացում որակեց դաշնակցական Վիտալի Բալասանյանին չսատարելու և Բակո Սահակյանին աջակցելու որոշում կայացնելու փաստը:
«Մայիսի 26-27-ը Ստեփանակերտում, 6 շրջկենտրոններում և 14 գյուղերում բնակվող մոտ 1000 չափահասների շրջանում անցկացված սոցհարցման արդյունքներով` մարդկանց 86,7 տոկոսը կարծում է, որ Բակո Սահակյանն արել է ի պաշտոնե պահանջվածը և ավելին, 10,5 տոկոսը մտածում է, որ նա արել է պահանջվածից քիչ, իսկ 2,8 տոկոսը՝ որ ոչինչ չի արել, միայն վնաս է բերել»,- ասաց նա:
Ադիբեկյանի խոսքով` վերջին տարիներին ԼՂՀ-ում թոշակառուների թվաքանակը իջել է 15 տոկոսի: «Արցախում այսօրվա դրությամբ ավելի քան 350 համայնք կա, կառուցվել է 8 նոր հյուրանոց, ՀՆԱ-ն աճել է 2,4 անգամ, աշխատավարձերը ավելացել են, աղքատների թիվը՝ նվազել:
Իրենց աղքատ են համարել հարցված ընտանիքների 19, համեստ՝ 73, ունևոր՝ 8 տոկոսը: Տասը ընտանիքներից մեկը, այսինքն՝ աղքատ ընտանիքների կեսը մնում է ծանր նյութական վիճակում, տասից չորսը՝ ոչ լավ-ոչ վատ, իսկ մնացած չորս-հինգը գոհ են իրենց կյանքից»,- ասաց նա:
Սոցիոլոգի տեղեկացմամբ` ԼՂՀ ներկայիս նախագահ, նախագահի թեկնածու Բակո Սահակյանը մեծ ժողովրդականություն և աջակցություն է վայելում: «Թեկնածուների վարկանիշը հետևյալն է. Բակո Սահակյան՝ 30 տոկոս, Վիտալի Բալասանյան՝ 3,5 տոկոս, Արկադի Սողոմոնյան՝ 1,5 տոկոս: Ընդ որում, ընտրություններին պարտադիր մասնակցելու պատրաստակամություն է հայտնել արցախցիների 84,3 տոկոսը: Մարդկանց 4,5 տոկոսն ասել է, որ հնարավոր է՝ մասնակցի, իսկ չմասնակցելու մասին հայտարարել է ԼՂՀ բնակչության 5 տոկոսը»,- ասաց սոցիոլոգը:
Ահարոն Ադիբեկյանի կարծիքով` կարևոր է նաև այն, թե ում են արցախցիները վստահում ԼՂ հիմնախնդրի հարցի լուծումը: «Ըստ այդմ, Բակո Սահակյանին վստահում է 24,7, Սերժ Սարգսյանին՝ 18,7, Ռոբերտ Քոչարյանին՝ 2,8 տոկոսը»:
Ամփոփելով՝ Ադիբեկյանը նշեց, որ իր անցկացրած սոցհարցման տվյալներով` Ղարաբաղի ցանկալի կարգավիճակի մասին թվային ցուցանիշները հետևյալն են. ԼՂՀ-ի՝ լրիվ անկախ պետություն լինելուն կողմ է բնակչության 44 տոկոսը, Հայաստանին միանալու կողմնակից է կրկին 44 տոկոսը, 8,8 տոկոսը ցանկանում է, որ ԼՂՀ կարգավիճակը մնա` ինչպես կա: Եվ միայն հարցվածների 0,2 տոկոսն է ցանկություն հայտնել վերադարձ Ադրբեջան՝ առավելագույն ինքնավարությամբ:
