Ծննդով կապանցի Կարինե Սողոմոնյանը ամուսնացել ու բնակվում է Երևանում: Հաճախ է լինում Կապանում: «Սովորաբար 4-5 ժամում տեղ էինք հասնում, բայց այսօր չգիտեմ` ինչ անեծք էր, 6 ժամ միայն ճանապարհին մնացինք»,- «Առաջին լրատվականի» հետ զրույցում ասաց տիկին Կարինեն: Վերջինս երեքամյա որդու հետ էր ու Երևան-Մեղրի միջպետական ճանապարհի Գորիս-Սիսիան հատվածը փակ լինելու պատճառով ստիպված էր ժամերով սպասել:
Ինչպես պատմեց Կ. Սողոմոնյանը, վախ բոլոր ուղևորների մոտ կար, «Անհանգիստ էինք ու չգիտեինք` ինչ է կատարվում: Միայն քամու ձայնն էինք լսում: Մեկ էլ ձյունը թափով լցվում էր մեքենայի վրա»,- ասում է նա: Մեկ-մեկ իջնում էին մեքենայից, բայց մոտակայքում գոնե սննդի կետ չկար, որ մտնեին:
Հիշեցնենք, որ փետրվարի 6-ի առավոտյան ժամը 4-ից փակ է Երևան-Մեղրի միջպետական ճանապարհի Գորիս-Սիսիան հատվածը: Մոտ 13 ժամ փակ մնալուց հետո, ժամը 17-ից ժամանակավորապես վերականգնվեց երթևեկությունը, այն էլ միակողմանի: Ճանապարհի այդ հատվածը սպասարկող Գորիսի «Ոսմար» ընկերության աշխատակիցներն ու 8 կտոր տեխնիկան` ձյունամաքրիչներ, տրակտորներ, քարշակներ ճանապարհի այդ հատվածում են: Ինչպես մեզ տեղեկացրին ընկերության հերթապահությունից, ժամը 00.30-ի դրությամբ ճանապարհը դժվարանցանելի է: «Ուժեղ քամին շարունակվում է, բուք է, ինչը դժվարացնում է աշխատանքը: Ֆիզիկապես հնարավոր չի մաքրել, չեն հասցնում: Կես մետրից ավել ձյուն է լցվել մայրուղին»,- ասաց հերթապահը: Նրա խոսքով, կուտակումներ կան, ընկերության քարշակները մեքենաներին ձգելով հանում են վտանգավոր գոտուց: Չի բացառվում, որ ճանապարհի այդ հատվածը գիշերը կրկին լրիվ փակվի:
«Ոսմար»-ի աշխատակիցները ամբողջ գիշերը հերթապահելու են այդ հատվածում: Սյունիքի փրկարարական ծառայությունից էլ տեղեկացանք, որ այս պահի դրությամբ փրկարարների անհրաժեշտություն չի զգացվել: