Human Rights Watch (HRW)-ը չի բացառում ՌԴ իշխանությունների հնարավոր պատժամիջոցներն ընդդիմադիրների, մասնավորապես՝ «Ձախ ճակատի» համակարգող Սերգեյ Ուդալցովի նկատմամբ:
Այս մասին նշվում է իրավապաշտպան կազմակերպության հաղորդագրության մեջ, որն ամփոփում էր մայիսի 12-ին Մոսկվայում անցկացված «Միլիոնների երթի» արդյունքները:
«Տարբեր քաղաքական հայացքներ ունեցող մարդիկ դուրս էին եկել ազատության լոզունգներով: Երթի ու միտինգի շրջան էին ուղարկվել ոստիկանության զգալի ուժեր, ինչը, սակայն, անհարիր էր խաղաղ հավաքի ֆոնին»,- ընդգծվում է հայտարարության մեջ:
Ընդ որում՝ կազմակերպությունում նշում են, որ «անցած շաբաթ միտինգների ու ցույցերի մասին օրենսդրության մեջ կատարված փոփոխությունները, որոնք ցուցադրաբար տուգանքներ են սահմանում առաջին հերթին դրանց կազմակերպիչների նկատմամբ, ստիպում էին մարդկանց պուրակով երթի ժամանակ հատկապես զգուշավոր լինել, որպեսզի չտրորեն խոտածածկը ու այդ կերպ իշխանություններին իրենց հանդեպ պատժամիջոցներ կիրառելու առիթ չտան»:
Ինչպես նկատում են HRW-ում, «ցուցարարների տրամադրությունը մռայլ էր նախորդ օրվա իրադարձությունների պատճառով, երբ իրավապահ մարմինները խուզարկություններ էին կատարել ընդդիմության ղեկավարներ Ալեքսեյ Նավալնիի, Սերգեյ Ուդալցովի, Իլյա Յաշինի, Քսենյա Սոբչակի, Բորիս Նեմցովի բնակարաններում»:
«Սակայն հապշտապ կերպով օրենսդրության խստացումը ու նախորդ խուզարկություններն ավելի շատ նման էին ընդդիմության ճանաչված ղեկավարներին չեզոքացնելուն և հաջորդ օրվա բողոքի երթի բոլոր հնարավոր մասնակիցներին վախեցնելուն ուղղված քայլերի»,- նշված է կազմակերպության հաղորդագրության մեջ: Նշվում է նաև, որ «Ձախ ճակատի» համակարգող Սերգեյ Ուդալցովը չի գնացել հարցաքննության ու միացել է ցուցարարներին՝ հայտարարելով, որ «դա իր համար սկզբունքային է, ու քննիչները թող սպասեն»:
