Եգիպտոսի նախկին նախագահ, ցմահ ազատազրկման դատապարտված Հոսնի Մուբարաքի վիճակը կայուն է: Այս մասին չորեքշաբթի օրը հայտարարել է Եգիպտոսի ՆԳՆ ղեկավար Մուհամմեդ Իբրահիմը:
«Ամեն օր ես ստանում եմ բժիշկների առավոտյան և երեկոյան կատարած հետազոտությունների արդյունքները նախկին նախագահ Հոսնի Մուբարաքի առողջության վերաբերյալ: Ներկա դրությամբ այն կայուն է: Վիճակի վատացման դեպքում Մուբարաքը կտեղափոխվի ռազմական հոսպիտալ, ինպես ցանկացած այլ կալանավոր»,- մանրամասնել է Իբրահիմը:
Անցած երկուշաբթի օրը լրատվամիջոցներում լուրեր էին տարածվել, որ Մուբարաքը կոմայի մեջ է, և նրա սիրտը մի քանի անգամ կանգ է առել: Ավելի ուշ Եգիպտոսի ՆԳՆ-ն այդ տեղկությունները հերքել էր: Այնուամենայնիվ, նախագահի մոտ են արդեն նրա երկու որդիները, որոնք նախնական կալանքի տակ են՝ եգիպտական բաժնետոմսերի շուկայում ապօրինի գործարքներ իրականացնելու մեղադրանքով:
Կահիրեի քրեական դատարանը 2012 թ. հունիսի 2-ին Մուբարաքին դատապարտել է ցմահ ազատազրկման՝ խաղաղ ցուցարարների սպանության համար:
Մուբարաքի առողջական վիճակը խիստ վատացել է դատավճռի կայացումից և նրան բանտ ուղարկելուց հետո: Հաղորդվում է, որ ամեն վայրկյան նրա ուղեղում արյան զեղում կարող է տեղի ունենալ:
Նրան բուժող բժիշկը հայտնել է, որ առկա սարքավորումները բավարար չեն անհրաժեշտ օգնություն ցուցաբերելու համար: Բացի այդ, բանտ չեն թողնում արտերկրացի բժիշկների:
