Սոցիալ-դեմոկրատական հնչակյան կուսակցության ղեկավար Լյուդմիլա Սարգսյանի գնահատմամբ, երկպալատ խորհրդարան ստեղծելու գաղափարը հերթական ինտրիգն է, որի նպատակն է քաղաքական ուժերի ուշադրությունը շեղել ընդհանուր պրոցեսներից, հասարակությանը ժամանակավոր մոլորության մեջ գցել եւ սիրաշահել Սփյուռքին:
«Դա այնպիսի առաջարկ է, որը չի կարող կյանքի կոչվել քանի դեռ Սահմանադրության մեջ լրջագույն փոփոխություններ չեն կատարվել եւ քանի դեռ Հայաստանի ժողովուրդը դրան համաձայնություն չի տվել: Վստահ եմ, որ իշխանությունները հասկանում են, որ այս գաղափարն իրագործել անհնար է, որովհետեւ մեխանիզմներ չկան, որովհետեւ Սփյուռքը մի երկիր չէ, որտեղ հնարավոր լինի կոնկրետ օրենքներով ապահովել երկրորդ պալատի պատգամավորների ընտրությունը»,- «Առաջին լրատվականի» հետ զրույցում կարծիք հայտնեց Լյուդմիլա Սարգսյանը:
Սարգսյանը կարեւորեց սփյուռքահայերի մասնակցությունը Հայաստանի կառավարմանը, սակայն, նրա խոսքերով դա պետք է արվի ոչ թե խորհրդարանում եւս մեկ պալատ ստեղծելով, այլ պետք է ստեղծվի հատուկ մարմին, որտեղ ընդգրկված կլինեն Սփյուռքի ներկայացուցիչները: Լյուդմիլա Սարգսյանի գնահատմամբ դա կլինի լավագույն լուծումը, քանզի այսօր գործող Սփյուռք –Հայաստան համաժողովները որեւիցե արդյունք չեն տալիս եւ ոչ պոպուլիստական ելույթների բեմահարթակ են պարզապես ապահովում:
Սարգսյանը նշեց, որ իրոք աշխատող մարմին պետք է ստեղծել, որը չլինի Հանրային խորհրդի նման` ժողովրդին մոլորության մեջ գցելու համար. «Այս մարմինը ստեղծվեց հանրային խնդիրներին լուծումներ տալու համար, սակայն արդյունքում այդ մարմինը որոշ դժգոհ մարդկանց իշխանական կերակրատաշտից օգտվելու հնարավորություն տվեց»:
Սարգսյանի գնահատմամբ, Սփյուռքը շատ լավ հասկանում է, թե ինքը ինչ դերակատարություն կարող է ունենալ հայաստանում եւ իշխանություններին չի ստացվի սիրաշահել նրանց. «Սա հերթական բլեֆն է»:
