Ռուսական Интерфакс լրատվական գործակալության փոխանցմամբ՝ Վրաստանի իշխանությունները պլանավորում են դադարեցնել բարձրագույն կրթության դիպլոմների հատկացումն այն անձանց, ովքեր անգլերեն չգիտեն: Այս մասին Բաթումում տեղի ունեցած միջազգային բժշկական կոնֆերանսի ժամանակ հայտարարել է Վրաստանի նախագահ Միխեիլ Սաակաշվիլին.
«Ով, ինչ էլ որ ասի, մենք մոտ ժամանակներս կանոն ենք մտցնելու, որի համաձայն՝ բուհերի՝ անգլերեն չիմացող շրջանավարտները չեն կարող դիպլոմ ստանալ:
Ռուսերեն իմանալը շատ լավ է, սակայն այսօրվա աշխարհում գործնականում տեղեկատվության ողջ հոսքն իրականացվում է անգլերենով, ինչի համար էլ այդ կանոնը պետք է պարտադիր լինի»:
2011/12 ուսումնական տարուց սկսած՝ Սաակաշվիլիի նախաձեռնությամբ Վրաստանի դպրոցներում սկսել են անգլերեն դասավանդել արտասահմանից ժամանած 1500 ուսուցիչ: Այս տարվա մարտի վերջին հայտնի էր, որ դիմորդների 73 տոկոսն օտար լեզվի ընտրության հարցում նախապատվությունը տվել է անգլերենին, 17 տոկոսը՝ ռուսերենին, 7 տոկոսը՝ գերմաներենին, 3 տոկոսը՝ ֆրանսերենին:
